.png)
Shuhet në moshën 82-vjeçare aktori Sir Michael Gambon.
Michael Gambon ishte më i njohur për rolin e profesorit Albus Dumbledore në gjashtë nga tetë filmat e “Harry Potter”.
Ylli i lindur në Dublin ka punuar në televizion, film, teatër dhe radio gjatë karrierës së tij prej gjashtë dekadash, derisa ka arritur të rrëmbejë katër çmime “Bafta”.
E veja e tij Lady Gambon dhe djali Fergus thanë se “burri dhe babai i tyre i dashur” vdiq në paqe në spital me familjen pranë tij, pas një periudhe pneumonie.
Familja e Sir Michael ishte zhvendosur në Londër kur ai ishte fëmijë, por ai bëri shfaqjen e tij të parë skenike në Irlandë, në një produksion të Othellos në Dublin në vitin 1962.
Karriera e tij mori hov kur u bë një nga anëtarët origjinalë të kompanisë së aktrimit të Teatrit Kombëtar të Laurence Olivier në Londër.
Po ashtu, ai fitoi tri çmime “Olivier” për shfaqjet në produksionet e Teatrit Kombëtar.
Ai luajti detektivin francez Jules Maigret në serialin “Maigret” dhe ishte i njohur gjithashtu për rolin e tij si Philip Marlow në “Denis Potter’s The Singing Detective” në BBC.
Sir Michael mori rolin e Dumbledore – drejtori i shkollës së magjistarëve Hogwarts – në serialin hit të “Harry Potter”, bazuar në romanet e JK Rowling, pas vdekjes së Richard Harris në vitin 2003.
Fiona Shaw, e cila luajti Petunia Dursley në filma, tha për BBC Radio 4: “Ai e ndryshoi karrierën e tij në mënyrë të jashtëzakonshme dhe kurrë nuk e gjykoi atë që po bënte, ai thjesht luante”.
Dame Eileen Atkins, një mike e vjetër e Sir Michael, tha për BBC Radio 4 në “The World at One” se ai ishte “një aktor i shkëlqyer dhe se kishte prani të mahnitshme në skenë”.
“Kishte diçka shumë të ëmbël tek ai, ky njeri i madh që mund të dukej shumë i frikshëm”.
Aktori, i njohur si “The Great Gambon” në qarqet e aktrimit, ishte shfaqur për herë të fundit në skenë në vitin 2012 në një prodhim në Londër të shfaqjes së Samuel Beckett “All That Fall”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
