.png)
Gazeta Si – Lista e tetorit do të ketë emra të rinj në Kombëtaren shqiptare, kjo është e sigurt. Mbetet të shihet cilët do të jenë këta emra konkretisht, por trajneri Silvinjo pak a shumë ka lënë të nënkuptohet se cilat do të jenë risitë për ndeshjen vendimtare me Çekinë dhe miqësoren me Bullgarinë.
‘Përforcimet ‘ i përkasin sulmit, me një lojtar qendre, një sulmues anësor dhe ndoshta edhe një fantazist. Marvin Çuni dhe Arbnor Muçolli janë më afër listës së trajnerit brazilian. Në disktutim mbetet Meritan Shabani, një tjetër kandidat për fanellën kuqezi, që luan me Grasshopers në Zvicër.
Çuni, i rritur sportivisht te Bajerni, ashtu si Shabani, luan me Frozinonen në Serinë A. Ai aktivizohet si qendërsulmeus, është 22 vjeç dhe 1.88 metra i gjatë. Një lojtar shtatlartë që mund t’í shërbejë Kombëtares në të ardhmen.
Muçolli, 24 vjeç, luan në rolin e sulmuesit të majtë dhe këtë sezon ka pasur një ecuri të mirë me skuadrën e tij, Goteborg. Ai ka nënshtetësi shqiptare dhe daneze, por ka zgjedhur të luajë për Shqipërinë.
Silvinjo, edhe pse gjërat po shkojnë shumë mirë aktualisht në Kombëtaren shqiptare, nuk nënvlerëson asgjë. Ai kërkon gjithmonë më të mirën për Shqipërinë dhe vazhdimisht është në kërkim të lojtarëve që mund të jenë elementë të rëndësishëm për fanellën kuqezi.
Së fundi trajneri brazilian ka ndjekur nga afër ndeshjen e Muçit me Legian në Europë, si dhe ka shkuar në Londër për të takuar nga afër Armando Brojën. Ai ka biseduar edhe me përfaqësuesit e klubit të Çelsit për t’u infiormuar më në detaje në lidhje me gjendjen e sulmuesit, nëse ai mund të grumbullohet në tetor apo jo. Kujtojmë që Broja vjen nga një mungesë e gjatë në fushë për shkak dëmtimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
