Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka deklaruar se Marrëveshja me Serbinë duhet të zbatohet plotësisht, pa vonesa e pa kushtëzime, nëpërmjet një plani të sekuencimit të drejtë, të balancuar e gjithëpërfshirës.
Ai ka deklaruar para studentëve në Universitetin Leiden në Hagë se Kosova e meriton statusin e vendit kandidat për anëtarësim në Bashkimin Evropian, ndërsa ka shtuar se rruga drejt BE-së është fat e vizion i Kosovës.
“Bashkimi Evropian është vizioni, fati e destinacioni ynë. Sinjali që japin dhe raportet e përpiluara për Kosovën siç është vetë ai i Komisionit Evropian, i cili dëshmoi suksesin e vendit tonë, mund të përdoret si kriter matës për të treguar se Kosova e meriton statusin e vendit kandidat. Zëvendëskryeministri Bislimi foli dhe mbi prapavijën e procesit të dialogut me Serbinë dhe Marrëveshjen Bazike të arritur këtë vit. Ai tha se marrëveshja duhet të zbatohet e plotë, pa vonesa dhe pa kushtëzime, përmes një plani të sekuencimit të drejtë, të balancuar e gjithëpërfshirës”, ka deklaruar Bislimi, thuhet në deklaratën e Zyrës së Komunikimit Publik të enjten.
Sipas deklaratës, Bislimi ka folur edhe mbi potencialin e Kosovës për zhvillim.
“Sa i përket integrimit evropian, foli mbi mbështetjen e gjerë të qytetarëve ndaj anëtarësimit në familjen evropiane. Me rëndësi është fuqizimi i mesazhit se Kosova, përmes institucioneve të saj të maturuara e të përgatitura, është e gatshme të bëjë hapa tutje në këtë proces”, thuhet më tej.
Më 14 shtator, Kosova e Serbia do të takohen në Bruksel për të diskutuar mbi procesin e dialogut.
Zyrtarë të Qeverisë së Kosovës kanë paralajmëruar se do të flitet për zbatimin e Marrëveshjes së Brukselit. /Marrë nga Koha.net/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.