.png)
Woody Allen magjeps publikun në Venecia me filmin e tij të pesëdhjetë, Coup de Chance. Mjeshtri i kinemasë së Nju Jorkut rikthehet në Festivalin e Filmit në Venecia pas një mungese gjashtëmbëdhjetëvjeçare.
Ashtu siç kishte bërë tashmë në Match Point, regjisori 87-vjeçar trajton temën e rëndësisë së fatit në jetë. Coup de Chance, i cili është jashtë gare në Festivalin e Filmit në Venecia, është një thriller i lehtë dhe elegant që magjeps audiencën dhe kritikët. Filmi është xhiruar tërësisht në frëngjisht. I vendosur në Paris, ai tregon historinë e bukuroshes Fanny (Lou de Laâge), një grua e lumtur e martuar me Jean (Melvil Poupaud), një biznesmen i pasur me një punë misterioze.
Megjithatë, kur Fanny, e cila punon në një galeri arti, “rastësisht” takon një shok të vjetër të shkollës Alain (Niels Schneider), i cili e kthen në ato vite kur ajo ishte më autentike, ajo fillon një histori të stuhishme dashurie me të dhe me zhvillime të paparashikueshme.
“Kam qenë gjithmonë shumë me fat në jetë”, nis regjisori në konferencën për shtyp. “Kisha prindër që më donin, grua dhe fëmijë dhe, deri tani në moshën 88-vjeçare, nuk kam qenë kurrë në spital për një ditë. Edhe si regjisor atëherë më shkoi mirë dhe shpresoj që ky fat të vazhdojë për mua”.
Kur do të ktheheni për të xhiruar në Nju Jork?
“Tashmë kam një ide të mrekullueshme për të xhiruar në qytetin tim. Nëse ndonjë i çmendur del përpara dhe thotë se dëshiron ta financojë, unë jam gati”.
Pse xhiruat një film në frëngjisht? “Të gjithë jemi rritur me filma europianë dhe gjithmonë kemi ëndërruar të bëjmë një film klasik europian. Doja të ndihesha si regjisor francez, gjerman, italian, me pak fjalë, regjisor europian”.
A është e vërtetë që jeni më i mirë në shkrimin e roleve femërore? “Kur isha tridhjetë, kur i shkruaja rolet për vete, isha mirë edhe në rolet e meshkujve, por gjithmonë isha më i mirë në ato të femrave”.
Para suksesit si nga kritika ashtu edhe nga publiku, Woody Allen pësoi një protestë që ndoshta as që e vuri re.
Rreth tridhjetë persona, kryesisht vajza, të grumbulluara pas barrierave, e pritën me thirrje proteste kalimin e regjisorit në tapetin e kuq. “Përdhunues!” bërtitën protestuesit ndërsa regjisori kaloi tapetin duke pushuar përpara blicit të fotografëve.
Siguria pak më pas e largoi grupin, të cilët teksa po largoheshin thërrisnin edhe “Poshtë patriarkati!”. Protesta lidhet me akuzat për ngacmim seksual. Para grupit të protestuesve, Allen u prit me duartrokitje dhe britma nga mbi pesëqind fansa që e prisnin prej disa orësh. Shumë të rinj kërkuan një autograf nga regjisori i njohur, i cili para se të hynte në Sala Grande për shfaqjen e filmit të tij, u afrua për t’u plotësuar dëshirën. Në hyrje të dhomës, rreth 300 persona të tjerë prisnin regjisorin për ta përshëndetur para se të hynin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
