Nga Gazeta ‘Si’-Më 7 shtator, sekretari i Përgjithshëm i NATO-s, Jens Stoltenberg, do të mirëpresë në takim presidenten e Kosovës, Vjosa Osmani, bëri të ditur aleanca ushtarake perëndimore.
Pritet që në takimin Stoltenberg-Osmani temë kryesore të jetë situata e sigurisë në Kosovë, veçmas në pjesën veriore, të banuar me shumicë serbe.
Zyra për media e misionit paqeruajtës, njofton po ashtu se Sekretari i Përgjithshëm dhe Osmani pas takimit do të mbajnë një konferencë të përbashkët për media në selinë e NATO-s.
NATO-ja disa herë ka shprehur mbështetjen për procesin e dialogut për normalizimin e raporteve mes Kosovës dhe Serbisë, që ndërmjetësohet nga Bashkimi Evropian. Po ashtu, aleanca ka kërkuar nga të gjithë faktorët në rajon që të bëjnë maksimumin për të ulur tensionet.
Gjithashtu, NATO ka përsëritur se do të mbetet e përkushtuar që përmes misionit paqeruajtës në Kosovë, KFOR, të ofrojë qetësi dhe siguri për të gjithë në Kosovë.
Për shkak të tensioneve në veri të Kosovës, që janë rritur që nga fundi i majit, NATO-ja ka rritur numrin e ushtarëve në kuadër të KFOR-it. Stoltenberg ka deklaruar disa herë se NATO-ja ka forca të mjaftueshme për të zbatuar misionin e saj në Kosovë.
Ndërkaq, Kosova ka shprehur ambiciet e saj për t’u integruar në aleancë, së pari përmes përfshirjes në programin e Partneritetit për Paqe, e më as edhe anëtare e NATO-s.
Por, NATO-ja ka theksuar se për secilin veprim në këtë drejtim vendimet në aleancë merren me konsensusin e të gjitha vendeve anëtare.
Në NATO, katër nga 31 vende anëtare (Spanja, Greqia, Rumania dhe Sllovakia) nuk e njohin pavarësinë e Kosovës
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
