Gazeta Si – Mes risive të listës së trajnerit Silvinjo për dy ndeshjet e muajit shtator ndaj Çekisë dhe Polonisë mund të jetë edhe grumbullimi i mbrojtësit Arlind Ajeti. Do të ishte një rikthim për mbrojtësin 29-vjeçar që aktualisht luan në Rumani me CFR Cluj.
Ajeti po kalon një formë shumë të mirë, ka qenë mjaft i rëndësishëm për klubin e tij dhe trajneri i Kombëtares po e mendon seriozisht grumbullimin e tij për kualifikueset e radhës, që janë vendimtare për objektivin e Euro 2024.
Mbrojtësi shihet si një kandidat shumë i fortë për të qenë në listën e trajnerit brazilian. Pritet po ashtu që të grumbullohen për herë të parë me kuqezinjtë sulmuesit Arbnor Muja dhe Mirlind Daku, sidomos i pari ka më shumë shanse.
Kujtojmë që Ajeti ka qenë pjesë e Kombëtares për shumë kohë, që nga viti 2014. Ai numëron 21 ndeshje me fanellën kuqezi dhe 1 gol të shënuar. Mbrojtësi ka luajtur në kampionate të ndryshme, si në Zvicër, në Itali dhe në Serinë A madje me Torinon, në Danimarkë dhe tani në Rumani.
Eksperienca e Arlind Ajetit mund t’i shërbejë trajnerit Silvinjo për dy sfidat vendimtare të shtatorit. Në mbrojtje do të mungojë sërish Kumbulla, i cili nuk është rikuperuar nga dëmtimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
