Nga Gazeta ‘Si’-Kryeministri i Kosovës, Albin Kurti, gjatë ditës së sotme është pritur nga homologu grek Kyriakos Mitsotakis, në pallatin “Maximos”, me të cilin pati një takim dypalësh.
“Kryeministri tha se Kosova dhe Greqia gëzojnë marrëdhënie të mira, të cilat po përmirësohen vazhdimisht si në rrafshin ekonomik përmes rritjes së shkëmbimeve tregtare, ashtu edhe në rrafshin politik përmes vizitave të shpeshta të krerëve institucionalë të të dyja shteteve”, thuhet në njoftimin e Zyrës së Kryeministrisë.
Në njoftim theksohet se në këtë takim Kurti e Mitsotakis kanë diskutuar edhe për situatën aktuale në veri të Kosovës dhe për dialogun me Serbinë.
“Biseduan edhe për dialogun në Bruksel dhe bashkëpunimin rajonal. Kryeministri Kurti tha që tashmë kemi marrëveshje, porse nevojitet zbatimi i plotë i saj dhe pa kushtëzime. Kujtoi që pas dakordimit të Bratislavës po bëhen dy muaj pa asnjë incident e protestë të dhunshme në katër komunat në veri të Kosovës. Pra kemi një situatë të shtensionuar e ku fokusi duhet të jetë tek parandalimi i ri-shtensionimit nga elementë të dhunshëm”, bën të ditur Zyra e Kryeministrit.
Takimi u dominua nga diskutimi në forcimin e marrëdhënieve ekonomike.
Kurti e ftoi Mitsotakis për vizitë dhe për më shumë investime në Kosovë. Shkëmbimi tregtar me Greqinë vitin e kaluar ishte 308 milionë euro, një rritje prej mbi 40% apo afër 100 milionë euro krahasuar me 2021.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
