.png)
Pas kundërshtisë dhe protestës nga Bashkësia Islame për paraqitjen e një filmi në mbrojtje të transgjinorëve në hapjen e Dokufest 2023, vjen edhe një reagim nga organizatorët e “Dokufest”.
Përmes një statusi të publikuar në llogarinë zyrtare të festivalit në Facebook, organizatorët e “DokuFest” kanë shprehur dyshime mbi përpjekje të caktuara për minimin e misionit të kësaj ngjarjeje kulturore.
Ata ritheksojnë se shfaqja që çoi në protesta në Prizren e grupit kanadez, “Peaches”, ishte mbajtur komfort rregullave etike dhe me kufizimeve të nevojshme.
“Jemi thellësisht të shqetësuar nga përhapja e fundit e dezinformatave që sugjerojnë se koncerti i hapjes së DokuNights ishte i qasshëm për të miturit, si dhe nga retorika nxitëse e urrejtjes që pasoi. Kjo na ka bërë të dyshojmë se ka përpjekje të fshehtë për të minuar misionin tonë për adresimin e të drejtave të njeriut dhe çështjeve sociale përmes artit dhe kulturës”, thuhet në postim.
“Dëshirojmë të vendosim gjërat drejt në lidhje me koncertin e artistes dhe aktivistes për të drejtat e njeriut, ‘Peaches’. Koncerti në fjalë u zhvillua brenda një zone të rrethuar mirë, e kufizuar rreptësisht për të pranishmit 18 vjeç e mbi, vetëm me bileta të blera”, thuhet më tej.
“DokuFest” i ka cilësuar akuzat në fjalë si “të pabaza”, ndërsa kanë shtuar se retorika e rezervuar rezultoi të prodhojë dhunë në protestën e bërë kundër mbajtjes së festivalit.
“Akuzat e pabaza ndaj festivalit tonë, fatkeqësisht kanë bërë jehonë në media, përfshirë ato ndërkombëtare, duke paraqitur një pamje të padëshiruar që keqinterpreton vlerat progresive dhe demokratike të shoqërisë sonë. Është thellësisht shqetësues fakti që retorika nxitëse nga disa figura publike ka eskaluar në dhunë gjatë protestës, siç u pa në rastin e gazetarit të mediumit Nacionale, Vullnet Krasniqi”, shkruajnë më tej organizatorët.
Në emër të festivalit është kërkuar sjellja pranë organeve të rendit dhe ligjit e të gjithë autorëve që kontribuuan negativisht në shprehjen e revoltës kundrejt edicionit të sivjetmë.
“Kërkojmë nga autoritetet që të sigurojnë që autorët e këtyre akteve të urrejtjes të sillen para drejtësisë”.
Në fund, ekipi i “DokuFest” u zotua të qëndrojë i palëkundur për realizimin e “misionit për promovimin e të drejtave të njeriut”.
“DokuFest është dhe do të jetë gjithmonë një fener për të drejtat e njeriut. Ne mbetemi të palëkundur dhe të sigurt në misionin tonë për të promovuar të drejtat e njeriut dhe barazinë për të gjithë”, përfundon reagimi i tyre.
“DokuFest”, nisi me 4 gusht dhe zgjati deri më 12 gusht, derisa tema e këtij viti “I AM AI AM I”, që vu në pah pikërisht marrëdhënien e ngushtë mes njeriut dhe inteligjencës artificiale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
