Ukraina nis ‘mësymjen’, godet sërish me dron një grataçelë ruse në Moskë

Gazeta Si – Një ndërtesë e lartë biznesi në kryeqytetin e Rusisë, Moskë, është goditur sërish nga një sulm me dron, tha kryetari i Moskës, Sergei Sobyanin, mëngjesin e 1 gushtit.

Disa dronë u rrëzuan gjatë natës, tha ai, por “njëri e goditi të njëjtën ndërtesë të lartë” në kompleksin Moskva City, i cili ishte sulmuar edhe të dielën.

Fasada e ndërtesës është dëmtuar në katin e 21-të, theksoi kryetari. Nuk raportohet për të lënduar.

“Disa dronë u rrëzuan nga sistemet tona mbrojtëse ajrore derisa po tentonin të arrinin në Moskë. Njëri e goditi të njëjtën ndërtesë në qytet sikur herën e kaluar”, shkroi Sobyanin në rrjetin social Telegram.

Ai po i referohej ndërtesës që ishte goditur nga një sulm i mëparshëm me dronë të dielën.

Aeroporti ndërkombëtar Vnukovo në Moskë u mbyll përkohësisht pas sulmit, sipas agjencisë shtetërore të lajmeve, TASS.

Ministria e Mbrojtjes e Rusisë e ka akuzuar Ukrainën për sulmin. Kievi nuk i komenton këto çështje zakonisht.

Zyrtarët rusë thanë të hënën se tre dronë ukrainas e sulmuan Moskën mëngjesin e 30 korrikut, duke e plagosur një roje sigurie.

Moska e ka akuzuar vazhdimisht Ukrainën se ka kryer sulme me dronë në territorin e saj në muajt e fundit, përfshirë një në Kremlin – vendbanimin e presidentit Vladimir Putin në kryeqytet – në muajin maj.

Ministria e Mbrojtjes e Rusisë e quajti sulmin e së dielës “tentim sulm terrorist” dhe pretendoi se një dron u rrëzua dhe dy të tjerët u bllokuan, duke u përplasur pastaj në kompleksin prestigjioz të biznesit në Moskë, Moskva-City.

Megjithëse zyrtarët ukrainas nuk kanë marrë përgjegjesi për sulme specifike, presidenti i Ukrainës, Volodymyr Zelensky, ka paralajmëruar se është “e pashmangshme” se “lufta” në Rusi do të ndodhë, pasi autoritetet ruse u detyruan ta mbyllin përkohësisht njëri prej katër aeroporteve më të mëdha në Moskë, pas sulmeve të 30 korrikut.

“Dalëngadalë, lufta po rikthehet në territorin e Rusisë – në qendrat e saj simbolike dhe bazat ushtarake. Dhe kjo është e pashmangshme, e natyrshme, dhe plotësisht e drejtë”, tha Zelensky gjatë një vizite në qytetin Ivano-Frankivsk më 30 korrik./REL/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.