Nga Gazeta ‘SI’ – Bankat tregtare në vend kanë dhënë më pak kredi për bizneset gjatë tremujorit të dytë. Sipas vetë bankave, kjo ka ndodhur sepse ato kanë qenë skeptike mbi rrezikun e gjendjes financiare së këtyre bizneseve dhe perspektivën e sektorit. Kushtet e kreditimit për to nuk kanë ndryshuar.
Por kërkesa e bizneseve për kredi ka qenë e lartë, sidomos nga bizneset e mëdha që kanë pasur nevojë për likuiditet.
Kërkesa për kredi e bizneseve pritet të jetë e lartë në tremujorin e tretë të vitit 2023, për financimin e investimeve, si edhe në mbulimin e nevojave për likuiditete. Në terma të madhësisë së biznesit, kërkesa për kredi pritet të jetë më e ulët në segmentin e biznesit të vogël e të mesëm.
Edhe për individët, bankat tregtare reduktuan dhënien e kredive, ndikuar nga niveli i të ardhurave të disponueshme të këtyre aplikuesëve dhe historiku i tyre me bankën.
Kërkesa e individëve për kredi u rrit gjatë kësaj periudhe, shumica me nevojën për të blerë banesa apo dhe nevoja konsumatore. Kushtet dhe termat e kreditimit mbetën thuajse të pandryshuar në tremujorin e dytë të vitit.
Në tremujorin e tretë të vitit 2023, bankat presin që kërkesa për kredi të jetë sërish e lartë, si në financimin e konsumit, ashtu edhe në blerjen e banesave
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
