.png)
Ish-presidenti amerikan, Donald Trump, ka thënë se pret të arrestohet nga autoritetet për trazirat e 6 janarit të vitit 2021 në ndërtesën e Kongresit amerikan, dhe përpjekjet për t’i sfiduar rezultatet e zgjedhjeve të vitit 2020.
Në një postim në rrjetet sociale, ai ka thënë se është informuar nga prokurori special Jack Smith, në mbrëmjen e së dielës, se ai është në shënjestër të hetimeve.
Mes tjerash, Trump ka përmendur se i është thënë të raportojë para një jurie të madhe “që pothuajse gjithmonë nënkupton arrestim apo padi”.
Smith nuk u është përgjigjur kërkesave të mediave për koment.
Nëse konfirmohet, ajo do të jetë padia e tretë për Trumpin lidhur me shkeljet e supozuara penale, përfshirë atyre edhe akuzat e ekipit të Smithit se ish-presidenti nuk i ka menaxhuar mirë dokumentet e klasifikuara.
Trump është akuzuar edhe në Nju Jork për falsifikim të dokumenteve biznesore më 2016, kur ka bërë një pagesë për të blerë heshtjen e një ylli të pornografisë.
Smith është emëruar prokuror special pak pasi Trump ka konfirmuar se synon edhe një mandat presidencial në SHBA.
Ekipi i Smithit ka kryer intervista me dhjetëra zyrtarë dhe këshilltarë të administratës Trump, përfshirë ish-nënpresidentin Mike Pence dhe avokatin e Trumpit, Rudy Giuliani.
Në trazirat e janarit të vitit 2021, mbështetësit e ish-presidentit, Donald Trump, e kanë kundërshtuar rezultatin e zgjedhjeve presidenciale të vitit 2020 – të cilat i ka fituar presidenti aktual, Joe Biden – dhe kanë hyrë në ndërtesë të Kongresit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
