Inflacioni i Eurozonës ka rënë në nivelin më të ulët që pas fillimit të luftës në Ukrainë duke rritur shpresat se politikëbërësit mund të ndalojnë rritjen e normave të interesit këtë verë.
Çmimet vjetore të konsumit ishin 6.1% në maj nga 7% në prill.
Ky është niveli më i ulët që nga shkurti i vitit 2022 dhe ishte më i ulët se niveli prej 6.3 për qind i parashikuar nga ekonomistët në një sondazh të Reuters.
Përcaktuesit e normave të Bankës Qendrore Europiane janë të fokusuar në inflacionin bazë, i cili përjashton çmimet e energjisë dhe ushqimeve.
Ai ra nga 5.6 për qind në prill në 5.3 për qind në maj, që është më shumë se sa prisnin ekonomistët, por kjo mund të mos jetë ende e mjaftueshme për të bindur politikëbërësit që të ndalojnë rritjen e normave në takimin e tyre të ardhshëm më 15 qershor.
BQE ka rritur tashmë normën e saj të depozitave me një ritëm të paprecedentë nga minus 0.5 për qind korrikun e kaluar në 3.25 për qind në prill. Investitorët po vënë bast se do të rrisë normat me 0.25% në takimin e ardhshëm pas dy javësh.
Inflacioni ra në 18 nga 20 vendet anëtare të eurozonës. Ai u rrit vetëm në Holandë dhe nuk ndryshoi në Maltë.
Presionet e çmimeve kanë qëndruar më të larta në Europë sesa në SHBA, ku inflacioni i çmimeve të konsumit ra në 4.9 për qind në prill.
Çmimet si në Europë ashtu edhe në SHBA janë ftohur më shpejt se në Mbretërinë e Bashkuar ku inflacioni ishte 8.7 për qind në prill.
Burimi: Financial Times/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
