Kryeministri britanik Rishi Sunak humbi 500.000 paund në ditë (gjatë vitit të kaluar)

Gazeta Si – Rishi Sunak “u rrëzua”: vitin e kaluar kryeministri britanik humbi gjysmë milioni paund në ditë (pak më shumë se 500,000 euro çdo 24 orë).

Kjo është ajo që del nga lista e të pasurve të “Sunday Times”, renditja vjetore në  Mbretërinë e Bashkuar: pasuria e kryeministrit dhe gruas së tij, Akshata Murty, në fakt është shembur në dymbëdhjetë muaj nga 690 milionë, në 529 milionë paund, me një humbje prej më shumë se 160 milion £, duke e rrëshqitur çiftin poshtë Mbretit Charles, pasuria e të cilit vlerësohet në 600 milionë £.

Arsyeja e kolapsit të Sunaksëve, qëndron në faktin se një pjesë e mirë e pasurisë së tyre përbëhet nga aksionet që Akshata mban në “Infosys”, kompania indiane e teknologjisë së babait të saj, i cili është një multi-miliarder ndër më të pasurit në Indi.

Ato aksione janë zhvlerësuar ndjeshëm gjatë vitit të kaluar, duke bërë që Sunak të humbasë më shumë se 200 milionë £ (megjithëse paketa e Akshatas vlen ende gati gjysmë miliardë paund).

Pavarësisht gjithçkaje, Sunaksët nuk u varfëruan papritur dhe ai mbetet ndoshta kryeministri më i pasur britanik në histori.

Vitin e kaluar, gruaja e tij mblodhi rreth 10 milionë euro dividentë nga “Infosys”, ndërsa kryeministri deklaroi të ardhura prej gati dy milionë paund, kryesisht si rezultat i investimeve financiare (paga e tij si kryetar qeverie në krahasim me këtë është vetëm një grusht thërrimesh, rreth 150,000 paund në vit): vitin e kaluar Sunak pagoi vetëm ekuivalentin e gjysmë milioni euro taksa.

Çifti jeton me dy vajzat e tyre në një shtëpi me pesë dhoma gjumi në Kensington, një nga lagjet më të shtrenjta të Londrës, me vlerë rreth 8 milionë euro, së cilës duhet t’i shtohet edhe një apartament aty pranë, ku presin miqtë dhe familjen.

Një tjetër pronë që ata zotërojnë është një vilë gjeorgjiane në Yorkshire, e blerë në vitin 2015, e cila me fushën e tenisit, pishinën dhe palestrën e saj, vlen mbi 2 milionë stërlina.

Në fund është një rezidencë në Santa Monica, Kaliforni, në një godinë të pajisur edhe me një banjë për kafshët shtëpiake, e cila vlerësohet mbi 6 milionë euro.

Nuk është rastësi që Sunak dikur kishte kapur pseudonimin “Maharajah i Yorkshire”: dhe është e dyshimtë që kolapsi relativ i pasurisë së tyre do t’i vendosë ata më shumë në harmoni me qytetarët e zakonshëm, duke u përballur me çmimet e larta dhe varfërinë.