.png)
Gazeta Si – Bomberi anglez gaboi në penalltinë që do ta çonte rezultatin në 2-2. Trajneri Southgejt e mbron nga kritikat pas eliminimit nga Botërori i Katarit.
Herri Kejn nuk e ka fshehur zhgënjimin pas humbjes me Francën, që i kushtoi eliminimin Anglisë. Kapiteni i ‘Tre Luanëve’ shënoi një gol me penallti, por humbi penalltinë e dytë, që do t’i jepte ndeshjes një tjetër rrjedhë.
Në rrjetet sociale Kejn ka shkruar: “Ndihem i shkatërruar plotësisht. Dhamë gjithçka dhe gjithçka u prish nga një detaj i vogël, për të cilin marr përgjegjësitë. Na dhemb ky eliminim, do na duhet kohë për ta kaluar, por është pjesë e sportit.
Tani na duhet të përdorim eksperiencën për të qenë mendërisht dhe fizikisht më të fortë për sfidën e radhës. Ju falënderoj të gjithëve për mbështetjen gjatë Botërorit, do të thotë shumë”, – ka shkruar sulmuesi i Totenhemit.
Nëse do të shënonte edhe në minutën e 84-t, Kejn mund ta çonte ndeshjen ne shtesë. Gjysmë ore më parë ai e fitoi duelin me Loris, kurse në tentativën e dytë e çoi topin te tifozët, duke shuar shpresat e miliona tifozëve anglezë.
Në mbrojtje të kapitenit Kejn ka dalë menjëherë trajneri Gareth Southgejt, i cili ka thënë: “Fitojmë dhe humbasim të gjithë bashkë si skuadër. U ndëshkuam në dy raste dhe shpërdoruam disa raste. Nuk do ishim këtu, nëse nuk do të ishte Kejn”. Trajneri e ka mbrojtur publikisht sulmuesin një ditë pas eliminimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
