.png)
Gazeta Si – Nuk ndalen polemikat mes Argjentinës dhe Francës pas finales së Botërorit të Katarit, me pretendime dhe akuza. Francezët madje kanë kërkuar përsëritjen e finales për shkak të gabimit në arbitrim, duke u kapur me golin e 3-të të Argjentinës, ku disa lojtarë të stolit të saj ishin në fushë para se Mesi të shënonte.
Në vendin amerikano-jugor ndërkohë po bëjnë një peticion online, që ka mbledhur tashmë më shumë se 500.000 firma. Në peticion i kërkohet “Francës të mos qajë më" pas humbjes në finale.
"Që kur kemi fituar, francezët nuk kanë pushuar së qari dhe së ankuari. Nuk e pranojnë që Argjentina të jetë kampione bote dhe që Mesi është më i mirë se Mbape", - janë fjalët e thëna për të përditshmen sportive 'Ole' nga ideatori i peticionit, Valentin Gomez. Peticioni ka bërë bujë në mediat argjentinase.
Në Francë pati shumë kritika për arbitrin polak të finales, Simon Marciniak. Përveç rasti të golit të dytë të Mesit, episod i kontestuar është edhe penalltia e Dembele ndaj Di Marias. Por ka edhe disa momente të tjera. Në këtë situatë vetë arbitri ka dalë në një konferencë shtypi, ku me anë të pamjeve ka mbrojtur punën e tij.
Francezët po ashtu kanë kritikuar sjelljen e disa prej lojtarëve të Argjentinës, sipas tyre aspak elegante, në festën e fitores. Ne veçanti janë kapur me portierin Emiliano Martinez. Presidenti i Federatës franceze, Noel Le Graet, i ka shkruar homologut të tij argjentinas, Klaudio Tapia, ku i ankohet për këtë lloj sjelljeje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
