.png)
Nga Gazeta Si – Elsa Lila është zyrtarisht një nga 26 këngëtarët e përzgjedhur, për edicionin e 61-të të Festivalit të Këngës në RTSH. Në listën e publikuar, bëhet i ditur edhe titulli i këngës së artistes që është në italisht, “Evita”, pra “Shmang”.
Dalja në skenë e këngëtares vjen, pas arrestimit në Itali për përfshirje me një grup kriminal, proces në të cilin arriti të fitojë pafajësinë.
Këngëtarja e njohur shqiptare i rikthehet skenës pas një periudhe të gjatë. Në Festivalin e Këngës, ajo ka lënë gjurmë me këngët si “Larg urrejtjes” dhe “Pyes lotin”, ndërsa në vitin 2007 mori pjesë edhe në “Sanremo” në Itali.
Në vitin 2017 në edicionin e 56-të të Festivalit, këngëtarja Elsa Lila u rikthye si e ftuar speciale ku performoi para publikut një kolazh këngësh të njohura të muzikantëve të mëdhenj si Vivaldi dhe Bethowen, ndërsa do të rrëfente me shumë emocion ndjesinë e rikthimit në skenën e madhe.
Pjesë e Festivalit të Këngës në edicionin e 61-të do të jenë edhe emra të tjerë të njohur skenës shqiptare si Manjola Nallbani, Rovena Dilo e Rezarta Smaja.
Për këtë vit, si kandidatë për fitues të Festivalit të fundvitit, që do të prezantojë vendin në Eurovizion 2023, në Liverpul të Britanisë së Madhe janë 22 këngëtarë dhe 4 grupe.
Pra në total do të jenë 26 performanca nga artistë që do të konkurrojnë për vendin fitues dhe që më pas do të përfaqësojë vendin tonë në “Eurovision Song Contest 2023”.
Në konkurrim, përpos emrave të njohur të skenës muzikore, janë edhe artistë të rinj, të cilët synojnë të prekin skenën më të madhe të muzikës shqiptare.
Festivali i 61-të të Këngës në RTSH do të japë 3 çmime të para: vendi i parë, vendi i dytë dhe vendi i tretë; 1 çmim për artistët e rinj dhe grupet alternative dhe 1 çmim për karrierë. Por ndryshe nga vitet e kaluar, Festivali i 61-të i Këngës në RTSH vjen me një risi lidhur me këngën që do të përfaqësojë Shqipërinë në Eurovizion, fituesi i së cilës do të zgjidhet me votat e publikut me anë të SMS-ve.
Çmimi për 3 vendet e para, çmimi për artistët e rinj dhe grupet alternative si dhe çmimi për karrierën do të jepen pas një vlerësimi nga juria.
Në festivalet e mëparshme të Këngës në RTSH fituesi i çmimit të parë ka përfaqësuar Shqipërinë në Eurovizion, por këtë vit, vendin tonë në “Eurovision Song Contest 2023” që do të zhvillohet në Britaninë e Madhe, do e përfaqësojë ajo këngë e cila do të rezultojë më e votuara nga publiku.
Artisti – Kënga
1. 2 Farm – Atomike
2. Alban Kondi & Lorela Karoshi – Melodi
3. Albina Kelmendi – Duje
4. Anduel Kovaçi – Malli
5. Arsi Bako – Sonte dua të jem me ty
6. Melodajna Mancaku – Gjysma e zemrës sime
7. Elsa Lila – Evita
8. Enxhi Nasufi – Burrë
9. Erma Mici – Kozmosi i dashurisë
10. Evi Reçi – Ma kthe
11. Fabian Basha – Një gotë
12. Fifi – Stop
13. Franc Koruni – Në pritje
14. Genti Hoxha – Ajër
15. Gjergj Kaçinari – Dje
16. Luna Causholli – Jetën ta fal
17. LYNX – Nëse ke besim
18. Manjola Nallbani – Dua
19. Permit of Stay – Fobia
20. Petrit Çarkaxhiu – Emri yt mirësi
21. Rezarta Smaja – N’Eden
22. Rovena Dilo – Motit
23. Sara Kapo – Para teje
24. Serxhio Hajdini – Vështirë
25. Urban Band – Në çdo hap
26. Vanesa Sono – Aroma jonë
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
