Gazeta Si – Gjykata Europiane e të Drejtave të Njeriut, e ka cilësuar të papranueshme kërkesën e ish-Guvernatorit të Bankës së Shqipërisë, Ardian Fullani për vendimin e shkarkimit të tij, ku kërkonte dëmshpërblim për “prishje imazhi”.
Gjykata ka vendosur unanimisht të rrëzojë Fullanin, i cili ka hedhur në gjyq shtetin shqiptar, pasi u shkarkua nga detyra në vitin 2014.
Në vendimin e Gjykatës së Strasburgut, theksohet se Fullani nuk kishte përdorur të gjitha mjetet juridike të brendshme në dispozicion të tij.
Fullani u shkarkua në 2014 pasi u akuzua për shpërdorim detyre pas zhdukjes së 713 milionë lekëve.
Më pas, ai u arrestua dhe gjykata e la në “arrest shtëpie”, por në dhjetor 2015, u shpall i pafajshëm nga Apeli.
Ish-Guvernatori i BSh, paditi në Gjykatën e Strasburgut shtetin shqiptar, pasi sipas pretendimit të tij, dështoi që ta rikthejë në detyrën që mbante para se të shkarkohej nga Parlamenti për skandalin e vjedhjes së 7 miliardë lekëve.
Në padinë e ngritur kundër shtetit shqiptar, ai pretendon gjithashtu dëmshpërblim për cenim të integriteti dhe prishje imazhi.
Fullani u arrestua për shpërdorim detyre në shtator të 2014. Pasi fitoi pafajësinë në të trija shkallët e gjyqësorit shqiptar, ai u ankua në Gjykatën Kushtetuese.
Kjo e fundit i dha të drejtë dhe e dëmshpërbleu me 56 paga, duke filluar nga momenti i shkarkimit e deri në vitin 2018, për një total prej rreth 300 mijë eurosh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
