Gazeta Si – Situata me lojtarët e Kombëtares u vështirësua ditët e fundit, sidomos me ata të mbrojtjes. Berat Gjimshiti dhe Marash Kumbulla i kanë humbur ndeshjet me Islandën dhe Izraelin në Ligën e Kombeve për shkak dëmtimi.
Lajmi i mirë për trajnerin Edi Reja është rikuperimi i Elseid Hysajt, i cili luajti pak minuta në fundin e ndeshjes me Napolin, ku Lacio humbi 1-2. Nëse edhe shkodrani nuk do ta kalonte dëmtimin, do të ishte vërtet problem, sepse mungesat në mbrojtje do të ishin të shumta.
Tjetër lajm i mirë për trajnerin e kuqezinjve është edhe aktivizimi i sulmuesit Armando Broja. Pas rinovimit të kontratës me Çelsin, Broja luajti 30 minuta në fitoren 2-1 ndaj Uest Hemit ditën e shtunë. Sa më shumë të luajë, aq më shumë mundësi ka të kapë formën optimale.
Listës së dëmtimeve ndërkohë i janë shtuar portieri Berisha dhe sulmuesi Manaj. Por i pari ka pësuar një dëmtim të lehtë dhe në ndeshjet e Ligës së Kombeve do të jetë. Prania e Manajt është në pikëpyetje, por shpresohet që edhe ai t’ia dalë.
Dy ndeshjet e radhës në Ligën e Kombeve janë shumë të rëndësishme për Kombëtaren. Në dy ndeshjet e para kuqezinjtë barazuan 1-1 në Islandë, por u mundën 1-2 nga Izraeli.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
