Nga Gazeta “SI”- Banka hungareze OTP Group ka njoftuar se ka përfunduar plotësisht blerjen e Alpha Bank në Shqipëri, e fundit me kapital grek në vendin tonë.
OTP planifikon që të përfundojë integrimin e Alpha Bank Albania me filialin e saj OTP Bank Albania në vitin 2023, duke zënë 11% të tregut bankar në vend, sipas njoftimit zyrtar të grupit hungarez.
Kontrata është nënshkruar drejtëpërdrejt nga Alpha Holdings, nisur që në dhjetor 2021, kur OTP kërkoi të blinte aksionet e plota të bankës, për 55 milion euro.
In 2019, OTP Group hyri për herë të parë në Shqipëri kur bleu 100% të aksioneve të filialit shqiptar të Societe Generale dhe e riemëroi OTP Bank Albania.
Transaksioni u miratua më herët gjatë vitit nga Autoriteti i Konkurrencës në vend dhe Banka e Shqipërisë. Guvernatori i Bankës së Shqipërisë, Gent Sejko, u shpreh se blerja 100% e aksioneve të Alpha Bank nga OTP do të konsolidojë më tepër tregun bankar dhe të rrisë konkurrencën. Ai shtoi se krijimi i bankave më të mëdha do të rrisë mundësitë e kreditimit dhe likuiditetin.
Gjatë 2021-shit, ishin pesë banka të interesuara për blerjen e Alpha, përfshirë Fibankm ABI Bank, Tirana Bank dhe Union Bank, por ngeli në dorë të hungarezëve të OTP-së.
Në një komunikim virtual, Alpha njoftoi mëngjesin e sotëm klientët e saj për blerjen duke i premtuar për shërbim “më të fortë, më të qëndrueshme dhe novatore”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
