Nga Gazeta “SI” – Shqipëria është vendi që pati rritjen më të madhe të volumit ndërtues në Europë, gjatë pandemisë, pas Rumanisë.
Në raport vjetor nga 2019-a në 2020-n, sektori i ndërtimit në vendin tonë u rrit me 9.3%, ndërsa në Rumani me 16%. Vendi i tretë me rritjen më të lartë është Malta, me 8.8%.
Në shifrat e publikuara nga Eurostat, në listën e vendeve, vihet re që një pjesë shumë e madhe e tyre kanë shënuar rënie të volumit ndërtues, ose rritje shumë të vogël, përfshirë Gjermaninë, Spanjën, Greqinë, Francën e cila ka pasur dhe rënien më të madhe, -15%.
Gjatë 2020-s, në të gjithë Europën sektori ndërtues pësoi rënie me 5%.
Për të gjithë vitin 2019, në Shqipëri u miratuan 1.044 leje ndërtimi në 1.9 milionë metra2.
Një vit më vonë, kur nisën kufizimet e pandemisë, numri i lejeve të dhëna për ndërtim dhe sipërfaqja për to u ul, por me pak diferencë. Për vitin 2020, u dhanë 961 leje në total me 1.6 milion m2.
Pas 2020-s, deri në tremujorin e parë 2022 (referuar Instat) volumi i ndërtimeve në Shqipëri, sidomos në kryeqytet, ka ardhur në rritje. Nga viti 2019 deri në tremujorin e parë 2022, në të gjithë vendin janë miratuar 3.798 leje ndërtimi në një sipërfaqe 8.02 milionë m2. Pjesa më e madhe e tyre është për rezidenca, trend i njëjtë me vendet europiane.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
