Industria e përpunimit të qumështit ka shënuar rënie përgjatë vitit, sipas të dhënave më të fundit të INSTAT.
Në fakt të njëjtën gjë e kanë konfirmuar edhe herë pas here operatorët të cilët kanë deklaruar që industria shqiptare e qumështit është në prag falimentimi.
Në vitin 2021, sasia gjithsej e qumështit të grumbulluar rezulton rreth 115 mijë tonë.
Sipas llojit, sasia e grumbulluar e qumështit të lopës është rreth 94 mijë tonë, sasia e grumbulluar e qumështit të deles është 13 mijë tonë dhe sasia e grumbulluar e qumështit të dhisë është rreth 8 mijë tonë.
Krahasuar me vitin 2020, sasia e grumbulluar e qumështit të lopës paraqitet me rënie 7.4%, ndërsa sasia e grumbulluar e qumështit të deles dhe dhisë paraqitet me rritje përkatësisht me 26.3% dhe 8.0%.
Sipas INSTAT, nga sasia gjithsej e qumështit të grumbulluar, rreth 14 mijë tonë është përdorur për prodhimin e qumështit për konsum njerëzor, pjesa tjetër shkon për përpunim. Struktura e qumështit të prodhuar për konsum paraqitet si më poshtë: qumështi i plotë i përpunuar 86.7%, qumështi gjysëm i skremuar 9.1%, qumështi i papërpunuar 3.5% dhe qumështi i skremuar 0.7%.
Nënproduktet e qumështit
Sasia e prodhuar e djathit sipas llojit të qumështit pësoi rritje me 12.0% dhe sasia e prodhuar e gjalpit pësoi rënie me 3.4%, krahasuar me një vit më parë. Ndërkohë, rënie me 6.1% shënoi sasia e prodhuar e djathit të përpunuar (djathë i shkrirë), krahasuar me një vit më parë.
Struktura e djathit të prodhuar sipas origjinës paraqitet: djathë nga qumështi i lopës 72.4%, djathë nga qumështi i deles 19.5% dhe djathë nga qumështi i dhisë 8.1%, ndërsa struktura e tij sipas fortësisë është: djathë i butë 53.9%, djathë gjysëm i fortë 22.9%, të tjera prodhime të freskëta 14.9% dhe djathë i fortë 8.3%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
