Gazeta Si – Armando Broja dhe Myrto Uzuni nuk do të jenë në dispozicion të trajnerit Edi Reja për transfertën e Islandës. Dy sulmuesit nuk janë në gjendje të luajnë më 6 qershor.
Janë mungesa me shumë peshë në transfertën islandeze, ku kuqezinjtë nisin aventurën në Ligën e Kombeve. Broja, sipas burimeve zyrtare të FSHF-së, nuk është rikuperuar plotësisht.
Sulmuesi në pronësi të Çelsit ka kryer një test të fundit të Covid-19 dhe ka dalë negativ, por po stërvitet individualisht. Broja nuk mund të jetë gati për ndeshjen e së dielës dhe do të bashkohet me grupin pas saj, në Durrës. Mund të luajë ndaj Izraelit dhe Estonisë.
Myrto Uzuni gjithashtu ka bërë stërvitje të diferencuar. Ai ka dëmtuar kaviljen në stërvitje dhe stafi mjekësor i Kombëtares ka vendosur që të mos udhëtojë me ekipin drejt Islandës.
Trajneri Reja ka vazhduar punën me lojtarët që kanë në dispozicion. Ndaj Islandës pritet që ai të hedhë në fushë Cikalleshin dhe Seferin në sulm. Kombëtarja do të udhëtojë të shtunën drejt kryeqytetit islandez.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
