.png)
Enkelejd Alibeaj mblodhi këtë të enjte një pjesë të deputetëve për t’u kërkuar edhe që të dalin me një qëndrim për procesin e zgjedhjes së Presidentit të ri të Republikës, procedurë që fillon zyrtarisht me 10 maj.
Pjesa e Rithemelimit e drejtuar nga Sali Berisha nuk e njeh Alibeajn duke e konsideruar një deputet të thjesht dhe për pasojë kërkoi më herët gjatë ditës që edhe deputetët të bojkotojnë mbledhjen me argumentin se grupin e thërret kryesia e grupit dhe për Presidentin duhet të vendosë Këshilli i ri Kombëtar.
Këtë proces ka sqaruar deputeti i PD-së, Edi Paloka. Përmes një konference për shtyp ai njoftoi se Këshilli Kombëtar mblidhet të premten.
“Komisioni i Rithemelimit, ka vendosur thirrjen e mbledhjes së parë të Këshillit Kombëtar të PD në datën 6 maj në orën 18:00. qëllimi përveç konstituimit të Këshillit Kombëtar, edhe përcaktimi i një qëndrimi politik të PD lidhur me procesin e zgjedhjes së Presidentit.
Mbledhja duhej mbajtur të paktën 5 ditë nga thirrja e Këshillit Kombëtar por për shkak të natyrës urgjente të çështjes që trajtohet, komisioni i Rithemelimit vendosi që të mbahet paraditen e kësaj të premteje.
Këshilli Kombëtar i PD është i vetmi organ i cili mund të përcaktojë qëndrimin e unifikuar të PD lidhur me çështjen e zgjedhjes së presidentit, pasi në bazë të statutit edhe të vjetrit e të riut, Këshilli Kombëtar i PD është organi më i lartë që drejton veprimtarinë politike të PD në periudhën mes dy Kuvendeve.
Në mbledhjen e parë të këshillit kombëtar, statuti përcakton të zgjidhet edhe kryetari i këshillit kombëtar” tha Paloka.
Më tej në një njoftim zyrtar specifikohet se, “Bazuar në nenin 44 pika 4 e Statutit, në mbledhjen e parë të konstituimit të Këshillit Kombëtar, zgjidhet edhe kryetari I këshillit kombëtar midis të paktën 2 kandidaturave alternative”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
