.png)
Rastet e fruthit janë rritur gati 80% në mbarë botën këtë vit mes përhapjes së Covid-19, ka thënë Unicef.
Ekspertët kanë paralajmëruar se rritja e sëmundjes do të nxisë edhe shpërthime të sëmundjeve të tjera.
Pandemia e koronavirusit ka ndërprerë fushatat e vaksinimit për sëmundjet e tjera në të gjithë botën.
Unicef ka deklaruar se kjo gjendje kërcënon shëndetin e fëmijëve në mbarë botën.
Fruthi është një sëmundje e shkaktuar nga një virus që prek kryesisht fëmijët. Komplikimet më serioze përfshijnë verbërinë, ënjtjen e trurit, diarrenë dhe infeksionet e rënda të frymëmarrjes.
Unicef shpjegon se vaksinimi prej të paktën 95% të popullatës, është mënyra më e mirë për të shmangur përhapjen e sëmundjes.
Në nivel global, Unicef ka raportuar më shumë se 17,300 raste të fruthit.
Christopher Gregory, këshilltar i lartë shëndetësor në seksionin e imunizimit të Unicef-it, ka thënë se për shkak se fruthi ishte sëmundje e parandalueshme nga vaksina, shërben si një shenjë paralajmëruese.
“Fruthi është ajo që ne e quajmë gjurmues, që na tregon me të vërtetë se ku janë ato dobësi në sistemin e imunizimit,” tha ai.
Sipas tij ethet e verdha ishin ndër sëmundjet që mund të rriteshin më pas.
“Ne jemi veçanërisht të shqetësuar për ato vende që janë më të brishta. Në vendet ku sistemet e kujdesit po merren me Covid-19”, tha ai.
Ekziston gjithashtu frika se lufta në Ukrainë mund të rikthejë një sërë sëmundjesh infektive në vend.
Agjencitë e OKB-së thanë se 57 fushata vaksinimi në 43 vende të shtyra në fillim të pandemisë nuk ishin përfunduar ende, duke prekur 203 milionë fëmijë.
Covid-19 gjithashtu vazhdon të grumbullojë presion mbi objektet e kujdesit shëndetësor.
“Ndikimi i këtyre ndërprerjeve në shërbimet e imunizimit do të ndihet për dekadat në vijim”, tha në një deklaratë shefi i OBSH-së Tedros Adhanom Ghebreyesus.
Sipas tij, tani është momenti për të rikthyer në rrugën e duhur imunizimin thelbësor. Ai shton se duhen fushata të reja, në mënyrë që të gjithë të kenë akses në këto vaksina.
Burimi: The Guardian/ Përshtati në shqip Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje