.png)
Rregullatori i barnave i Bashkimit Evropian (EMA) miratoi këtë të hënë përdorimin e vaksinës së COVID-19 nga Novavax me bazë në SHBA te njerëzit 18 vjeç e lart, duke hapur rrugën për vaksinën e pestë të Covid-19.
Të dhënat nga dy studime të mëdha treguan se vaksina ka një efikasitet prej rreth 90%, tha Agjencia Evropiane e Barnave (EMA), duke shtuar se aktualisht kishte të dhëna të kufizuara mbi efikasitetin e saj kundër disa varianteve shqetësuese, duke përfshirë Omicron.
“Pas një vlerësimi të plotë, komiteti i barnave humane i EMA (CHMP) përfundoi me konsensus se të dhënat mbi vaksinën ishin të forta dhe plotësonin kriteret e BE-së për efikasitetin, sigurinë dhe cilësinë,” tha rregullatori.
Infeksionet COVID-19 kanë thyer rekorde në pjesë të Evropës javët e fundit, me qeveritë dhe studiuesit që përpiqen të forcojnë mbrojtjen kundër variantit të koronavirusit Omicron që përhapet me shpejtësi, duke nxitur kufizime përpara festave.
Miratimi për vaksinën me dy doza, të quajtur Nuvaxovid, vjen shumë përpara autorizimit të mundshëm në Shtetet e Bashkuara, ku Novavax-it i është dashur të zgjidhë çështjet e prodhimit dhe pritet të marrë miratim në fund të vitit.
Procesi rregullator në BE gjithashtu ka zgjatur më shumë sesa pritej. Agjencia Evropiane e Barnave filloi një rishikim të vazhdueshëm të të dhënave që prej muajit shkurt.
Novavax dhe BE arritën një marrëveshje paraprake në dhjetor të 2020 për furnizimin e vaksinës, por për shkak të çështjeve rregullatore dhe të prodhimit, kontrata përfundimtare për deri në 200 milionë doza u nënshkrua vetëm në gusht. Kompania tha të hënën se do të fillojë dërgimin e vaksinave në 27 shtetet anëtare të BE-së në janar.
Burimi: Reuters/ Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
