Pas humbjes së thellë në Londër, trajneri Edi Reja i është përulur forcës së kundërshtarit, duke i bërë elozhe për gjendjen fizike dhe kualitetin. Ai është justifikuar me forcën e Anglisë dhe dëmtimet e shpejta, por në një fare mënyre ka pranuar se ka gabuar me strategjinë e tij për të bërë presing lart, që te mbrojtja kundërshtare.
“Përqendrimi nuk ka të bëjë, ata u nisën shumë shpejt dhe janë shumë të fortë fizikisht. Nuk arritëm t’i mbanim dot. Nga pikëpamja fizike kishte një diferencë të madhe. Në pjesën e dytë u sistemuam dhe luajtëm me personalitet, por edhe ata u ndalën pak. Ne bëmë ndryshime, duke hedhur lojtarë më të fortë fizikisht. Anglia kishte dominim total në nisjet e saj, e kishim të vështirë t’i ndalnim.
Menduam të luanim me presing, duke i sulmuar lart, por më pas nuk ia dilnim. Po të riluhej ndeshja, do të mbyllesha në mbrojtje si në pjesën e dytë, por herët a vonë ata do të bënin gol. Më interesonte ta shihja ekipin më lart. Në këto nivele për ne është e vështirë t’i përmbajmë kundërshtarët, nuk mundemi. Pastaj, patëm dy dëmtime dhe rezultati shkoi menjëherë 2-0, duke e bërë gjithçka edhe më të vështirë, sepse kur i bën zëvendësimet, pastaj mbetesh pa alternativa.
Imazhi i Shqipërisë? Nuk e prish kjo humbje në Londër, sepse këtu mund të humbësh me një skuadër si Anglia, që luajti me shumë grintë. Një ekip kaq i karikuar dhe me këtë kualitet vë poshtë këdo, jo vetëm Shqipërinë, por edhe ekipe më të forta”, – theksoi trajneri i Shqipërisë pas ndeshjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
