.png)
Është lënë hapur mundësia se edhe në Shqipëri njësoj si në Kosovë, qytetarëve mund t’u kërkohet një dozë vaksine minimalisht, për të hyrë në kafene, klube nate, dasma etj.
Kryetari i Shoqatës së Bar-Restoranteve, Enri Jahaj, u shpreh për Gazetasi.al se e njëjta zgjidhje do të ishte mirë të vihej në funksion edhe në vendin tonë.
Jahaj përmendi dhe faktin se më herët klubet e natës kanë kërkuar që të bëheshin ambjent i procesit të vaksinimit për qytetarët.
Momentalisht sipas Ministrisë së Shëndetësisë janë vaksinuar 1.238.036 qytetarë, gjysma e të cilëve kanë marrë dy doza vaksine. Rrjedhimisht masa e klientëve mund të reduktohet, por sipas z.Jahaj dëmi tashmë është bërë me kohë. “Mjafton që të hapemi plotësisht”, thekson ai.
Shqipëria përveç orës policore, nuk ka asnjë kufizim tjetër anti-Covid, paralelisht me fushatat sensibilizuese për vaksinimin.
NJë ditë më parë në Kosovë u vendos që për të shkuar në dasma, klube nate dhe qendra tregtare, qytetarët duhet të jenë të vaksinuar.
“Çdo qytetar i Kosovës në mënyrë që të marrë pjesë në çdo aktivitet shoqërorë, qoftë qendër tregtare, klube të natës apo në ahengjet familjare obligohet që të marrë vaksinën anti-covid, sepse nga data 20 gusht do të kërkohet që të paktën dozën e parë ta kenë të përfunduar përndryshe nuk mund të marrin pjesë në asnjë aktivitet”, -thuhet në njoftimin nga Oda e Hotelerisë dhe Turizmit në Kosovë.
Stafi i punonjësve të këtyre sektorëve duhet të jetë i vaksinuar të paktën me dozën e parë të vaksinës, deri më 12 gusht.
Bëhet e ditur se është diskutuar edhe zgjatja e orarit për klubet e natës. “Gjithashtu sa i përket orarit të klubeve të natës u bisedua që të ketë zgjatje pra këto aktivitete të fillojnë nga ora 23:00 deri në ora 03:00 pas mesnate”, bën të ditur njoftimi. Ky vendim pritet të hyjë në fuqi më 11 gusht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
