.png)
Një variant i ri i koronavirusit paksa i modifikuar krahasuar me “Delta”-n, po përhapet në të gjithë botën, i pagëzuar nga media ndërkombëtare si “Delta +” (Plus).
Varianti në të vërtetë quhet B.1.617.2.1 ose AY.1, dhe u identifikua në Indi nga Instituti i Gjenomikës i Këshillit Kombëtar të Kërkimit dhe është i pranishëm në tre shtete.
Sipas raporteve nga CNN, në Mbretërinë e Bashkuar, një vend që gjithmonë ka kryer shumë hetime gjenomike duke sekuencuar të paktën 10% të tamponëve pozitivë, rastet e para janë raportuar në 28 prill, kështu që ndoshta ka qarkulluar që prej pranverës. Deri më sot, mbi 200 raste janë identifikuar në 11 vende të ndryshme.
Ekspertët e shëndetit publik, po studiojnë se “Delta Plus” është më i transmetueshëm se varianti “Delta” dhe “Alpha”, edhe pse një përgjigje është ende e parakohshme, duke pasur parasysh numrin e kufizuar të mostrave të sekuencuara deri më tani.
Ndryshimet midis “Delta” dhe “Delta +”?
Të gjitha variantet kanë mutacione të ndryshme. “Delta Plus”, krahasuar me “Delta”-n, ka një mutacion më shumë, të quajtur K417N. Ky është një mutacion në proteinën “Spike”, pjesa e virusit që bashkohet me qelizat që infekton. Mutacioni K417N, nuk është krejt i ri dhe ka lindur në mënyrë të pavarur në disa prejardhje virale. Është i njëjtë me variantin “Beta” (i cili u përhap në Afrikën e Jugut) dhe gjithashtu për një lloj që u gjet në Katar në mars 2020.
Sa duhet të shqetësohemi me këtë variant?
Sipas Agjencisë Covid-19 të Gjenomit të Sekuencave të Qeverisë Indiane, varianti “Delta Plus” ka disa tipare shqetësuese, si rritja e transmetueshmërisë, lidhja më e fortë me receptorët e qelizave të mushkërive dhe një ulje e mundshme e përgjigjes së antitrupave. Nuk është ende e qartë se çfarë efekti mund të ketë mutacioni në efikasitetin e vaksinës, por Julian Tang, një profesor i shkencave respiratore në Universitetin e Leicesterit, paralajmëroi se mund të jetë potencialisht një varianti “i aftë për t’i shpëtuar vaksinës”.
Sidoqoftë, shkencëtarët ftojnë të gjithë të jenë të kujdesshëm dhe të qetë, sepse ka ende pak raste të raportuara.
“Në këtë fazë nuk ka arsye të veçanta për shqetësim: është një “Delta” me mutacion shtesë K417N në proteinën spike”, thotë Francois Balloux, profesor i biologjisë së sistemeve llogaritëse dhe drejtor, Institutit të Gjenetikës UCL.
“Varianti u pa për herë të parë në Indi në 5 prill 2021, – shton shkencëtari, – por përhapja e tij ka mbetur jashtëzakonisht e ulët, me përjashtim të Nepalit, ku një përhapje prej rreth 4% është vlerësuar në një mostër shumë të vogël. Delta +, tani përfaqëson 0.00002% të të gjitha varianteve “Delta” të sekuencuara deri më sot. Nuk ka asnjë provë që varianti aktualisht po zgjerohet në ndonjë vend tjetër”.
“Ne ende nuk e dimë nëse AY.1 ka ndonjë avantazh ndaj ‘Delta’-s, por duket e vështirë, se ndryshimi i vetëm është mutacioni K417N”, – tha profesori David Robertson, kreu i gjenomikës virale në Qendrën për Kërkimin e Virusit në Gllazgou, Skoci.
“Nuk ka asnjë provë që AY.1 është më i transmetueshëm ose që i shpëton imunitetit të shkaktuar nga vaksinat. Mutacioni është parë gjithashtu në disa nënlloje të “Alpha”-s, pa një rritje të ndjeshme në zgjerimin e rasteve. Ndoshta nuk është më infektiv, por mund të ndikojë në përgjigjen e antitrupave pas vaksinës”.
Transmetueshmëria, vdekshmëria, vaksinimet?
“Duke pasur parasysh numrin e vogël të llojeve të raportuara, – shpjegon Francois Balloux, – asgjë nuk dihet në lidhje me transmetueshmërinë, evazionin imunitar ose vdekshmërinë e llojit ‘Delta +’. Sidoqoftë, duke qenë se ajo ka mbetur në një frekuencë shumë të ulët në vendet ku është identifikuar, ka të ngjarë që nuk është më i transmetueshëm se paraardhësi i saj ‘Delta’”.
Çfarë është mutacioni K417N?
Mutacioni K417N, u ngrit në mënyrë të pavarur në prejardhje të ndryshme (të paktën dy herë te ‘Delta’). Është vëzhguar në 27 mars 2020 në një lloj të gjetur në Katar. K417N është përgjithësisht i pranishëm në variantin “Beta” (1.351), ish-varianti i “Afrikës së Jugut”.
Ky mutacion mund të kontribuojë në rrjedhjen imune, megjithëse ndikimi i tij në transmetueshmëri është i paqartë. Asnjë prej prejardhjeve që përmbajnë K417N, nuk kanë qenë të suksesshëm në përhapjen deri më tani, me përjashtim të “Beta”-s.
Ku është i njohur “Delta Plus”?
Deri më tani, “Delta Plus” është raportuar në 11 vende, por numri i rasteve për secilin vend pasqyron numrin e mostrave që janë sekuencuar dhe duhen më shumë të dhëna për të përcaktuar shkallën aktuale të përhapjes.
Që nga 16 qershori, 83 raste ishin konfirmuar në Shtetet e Bashkuara të Amerikës, 14 në Mbretërinë e Bashkuar (të gjithë njerëzit që kishin udhëtuar në Nepal dhe Turqi). India ka numëruar 40 raste, të shpërndara në tre shtete: Maharashtra, Kerala dhe Madhya Pradesh. Pjesa tjetër e rasteve janë përhapur në të gjithë Kanadanë, Japoninë, Nepalin, Poloninë, Portugalinë, Rusinë, Zvicrën dhe Turqinë.
Përshtati në shqip: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje