Prokurori i Përgjithshëm, Olsian Çela ka kërkuar hetim të krimeve të mundshme zgjedhore, duke iu kërkuar vartësve të tij që të intensifikojnë hetimet.
Kërkesa e Çelës, vjen pas akuzave dhe denoncimeve që PD dhe opozita kanë bërë ditët e fundit, duke pretenduar parregullsi në procesin zgjedhor.
Dy ditë më parë Prokuroria e Posaçme kundër Korrupsionit dhe Krimit të Organizuar, njoftoi se është duke vazhduar ndjekjen penale për rastet që lidhen me veprat penale në fushën e zgjedhjeve, “Korrupsioni aktiv në zgjedhje” dhe “Korrupsioni pasiv në zgjedhje”.
Hetimi për parregullsitë në procesin zgjedhor, është kërkuar edhe nga ndërkombëtarët. Një ditë më parë, ambasadori i Britanisë së Madhe në Tiranë, Duncan Norman, kërkoi nga institucionet shqiptare të hetojnë të gjitha parregullsitë e pretenduara në lidhje me procesin.
Partia Demokratike dhe Lëvizja Socialiste për Integrim, i kanë kërkuar po ashtu KQZ-së pamjet filmike të kamerave të qendrave të votimit në rang vendi, me pretendimin se procesi zgjedhor i 25 prillit ka qenë i manipuluar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
