Presidenti Ilir Meta, e ka cilësuar si një lajm tronditës ndarjen nga jeta të ish-kryeministrit dhe deputetit socialist, Bashkim Fino.
Ndërsa e quan Finon një mik, koleg, politikan të moderuar dhe qytetar aktiv e familjar shembullor, Meta ka shprehur ngushëllimet e tij.
“Ndarja e papritur nga jeta e mikut, kolegut, politikanit të moderuar dhe e Kryeministrit të Pajtimit Kombëtar në vitin e vështirë 1997, qytetarit aktiv e familjarit shembullor, Bashkim Fino, na ka tronditur të gjithëve këtë mëngjes. Dhimbje e madhe, që na ka lënë pa fjalë! Ngushëllimet më të ndjera, të prehet në paqe dhe përherë i paharruar në kujtimet tona”, shkruan Meta.
Edhe kreu i Partisë Demokratike, Lulzim Basha, ka shprehur ngushëllimet e tij për familjen Fino.
Ai shprehet se kontributi i Finos në politikën shqiptare do të vlerësohet gjithmonë.
“I shpreh ngushëllimet më të sinqerta familjes Fino dhe të gjithë të dashurve të tij. U prehtë në paqe! Me trishtim mësova lajmin për ndarjen nga jeta të ish-kryeministrit, ish-ministrit dhe ish-deputetit Bashkim Fino. Jam i bindur se kontributi i Bashkim Finos në politikën shqiptare do të vlerësohet gjithmonë si një zë i rëndësishëm për stabilitetit politik & shoqëror të vendit”, – shkruan kryedemokrati në rrjetet sociale.
Deputeti socialist Bashkim Fino humbi jetën nga koronavirusi në orët e para të mëngjesit të sotëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
