.png)
Trajneri i kombëtares, Edi Reja, është i qetë sa i takon mbrojtjes. Në prag të tri ndeshjeve të para eliminatore të “Katar 2022”, lojtarët e prapavijës duken në formë shumë të mirë. Berat Gjimshiti është në top-formë me Atalantën, Kumbulla po merr më shumë minuta me Romën, ndërkohë që edhe Ardjan Ismajli po kalon një moment shumë të mirë.
Mbrojtësi i Specias ishte titullar në fitoren 2-1 ndaj Kaljarit, shumë e rëndësishme për qëndrimin në Serinë A. Ismajli ka fituar tashmë besimin e trajnerit dhe po luan rregullisht. Paraqitja e tij në ndeshjen e sotme ishte mbi nivelin mesatar dhe është vlerësuar me notën 6.5 nga shtypi sportiv italian. Shtatlarti i Kombëtares luajti 90 minuta të plota, ndërsa Specia, me këtë fitore, i largohet zonës së ftohtë.
Lajme të mira edhe për portën kuqezi. Etrit Berisha tregoi një formë shumë të mirë sot, në fitoren 1-0 të Spalit ndaj Çitadelës. Portieri titullar i Shqipërisë fitoi kështu derbin me Elhan Kastratin, që mbron portën e Çitadelës. Titullarë sot me ekipet e tyre ishin edhe Nedim Bajrami (Empoli) dhe Ledjan Memushaj (Peskara), ndërsa Kastriot Dermaku (Leçe) qëndroi në stol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
