Qeveria do të rishikojë me rritje penalitet ndaj bizneseve që shkelin rregullat anti-Covid të distancës fizike dhe higjienës dhe në varësi të rezultateve që do të japë në uljen e numrit të infektimeve do të vendosë për ashpërsimin e masave kufizuese.
Rishikimi i gjobave u paralajmërua këtë të hënë nga Kryeministri Edi Rama. Ai foli për një neglizhencë të patolerueshme nga ana e bizneseve në respektimin e masave anti-Covid. Rama tha se policia do të shtojë kontrollet për zbatimin e masave.
“Policia do të zbatojë me forcë zbatimin e masave dhe me gjobat përkatëse që do t’i rrisim së shpejti dhe në ditët në vijim do të rrisim gjobat për baret, lokalet, restorantet dhe qëndrat tregtare dhe do të bëjmë një përshkallëzim sipas hapësirave dhe kushteve për abuzim”, tha Rama.
Në lidhje me ashpërsimin e masave…
“Këto ditë do të shohim reagimin pas këtij mesazhi dhe do të përgatitemi për zbatimin rigoroz të masave dhe për të parë më pas se çfarë mund të bëjmë kufizime të tjera që të kenë ndikim maksimal në uljen e infektimeve. Për momentin nuk kemi, por duhet të reagojmë më fort me qytetarët që nuk vënë maskën në të gjitha mjediset ku janë jashtë shtëpisë”, tha Rama.
Ministrja e Shëndetësisë tha se ka dyshime të arsyeshme që në vend kanë hyrë variantet e reja të Covid.
“Jemi në pritje dhe po çojmë mostrat e radhës në laboratorin në Berlin për të vërtetuar dyshimet tona”, tha Ogerta Manastirliu.
Ministria deklaroi se shtimi i rasteve ditët e fundit ishte i parashikuar nga ekspertët dhe justifikoi rritjen e tyre me disa arsye. Sipas ministres, arsyeja është grumbullimi i njerëzve në ambiente të mbyllura, mosrespektimi i masave të sigurisë dhe dyshimi se në vend kanë hyrë variantet e reja të Covid, që janë edhe më ngjitëse.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
