Policia ka nisur kontrollet në fshatin Larushk , në afërsi të Nikës, pasi burime për Top Channel bëjnë me dije se janë identifikuar autorët e vrasjes së Shkëlzen Kastratit.
Burime për Top Channel bëjnë me dije gjithashtu se dyshohet për katër persona të dyshuar si autorët e këtij ekzekutimi.
42 vjeçari Shkëlzen Kastrati, mbeti viktimë e një atentati mëngjesin e kësaj të hëne rreth orës 10:30 minuta pikërisht në rrethrrotullimin e sheshit, në hyrje të Fierit.
Ai po vinte nga ky drejtim siç shihet në pamje me automjetin e tij Mercedez Benz, ndërsa autorët po e ndiqnin me një automjet tip Range Rover, nga edhe ku e qëlluan. Viktima humbet kontrollin e makinës dhe përplaset me një tjetër automjet në këtë rrugë, në të cilën ndodheshin babë e bijë, duke rrezikuar edhe jetën e tyre. Siç mund të shihet tashmë në vendngjarje ka edhe copa xhami nga përplasja e dy automjeteve. Viktima humbi jetën menjëherë pas atentatit.
Autorët u larguan nga vendi i ngjarjes dhe disa minuta më pas, në mbikalimin e fshatit Baltëz, në By-passin e Fierit, policia gjeti te djegur mjetin tip Range Rover. Grupi hetimor, brenda këtij mjeti, gjeti edhe armën tip automatik, me të cilën dyshohet se u krye ekzekutimi.
Automjeti Range Rover, sipas të dhënave që Top Channel ka siguruar nga policia e Fierit, rezulton që të jetë i vjedhur në Greqi, çka grupit hetimor i ka shtuar dyshimet për një atentat të mirëorganizuar.
Ekzekutimi i Shkëlzen Kastratit, dyshohet, së është vazhdimi i vrasjes së ndodhur në vitin 2016 në Fier, ku shënjestër ishte Klement Kastrati, vëllai i viktimës. Shënjestra bashkë me një tjetër person mbetën të plagosur, ndërsa u vra një shtetas nga Patosi.
Por konfliktet janë më të hershme. Ato kanë nisur që rreth vitit 2000, ku më pas janë vrarë 3 të afërm të viktimës së kësaj të hëne. Aktualisht, dyshimet kryesore janë për çështje hakmarrjeje. Burime të sigurta të Top Channel nga policia thonë se po punohet paralelisht në dy pista; në atë të një përplasjeje me një grup kriminal nga Vlora dhe pista tjetër, përplasje me një tjetër grup nga Tirana. Top Channel
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
