Policia e Tiranës ka arrestuar infermieren e Spitalit Infektiv, e cila u denoncua pak ditë më parë në emisionin investigativ “Stop” për vjedhjen e portofolit të një pacienti me Covid-19, si dhe kartën e tij bankare, teksa ky i fundit kishte ndërruar jetë.
Policia thotë se ka rënë në pranga infermierja e turnit, Ronida Hysa, pas kallëzimit nga djali i të ndjerit.
“Specialistët për Hetimin e Krimit në Komisariatin e Policisë Nr. 4, në bashkëpunim me Prokurorinë e Rrethit Gjyqësor Tiranë, kanë bërë të mundur identifikimin, lokalizimin dhe ndalimin e shtetases R. H., 30 vjeçe, banuese në Durrës. Ndalimi i kësaj shtetaseje u bë pasi në bazë të pamjeve filmike rezulton si autorja e vjedhjes së një shume parash në portofolin e shtetasit K. D., i cili ka qenë i shtruar në spitalin infektiv, ku ka ndërruar jetë nga COVID-19”, njofton policia.
Djali i të ndjerit ka thënë në polici se infermierja ka tërhequr shumën prej 60 mijë lekësh nga karta e pacientit.
Policia thotë se në bazë të provave filmike ka rezultuar se edhe shuma e parave është tërhequr nga infermierja në spitalin infektiv, e cila ka pranuar autorësinë e ngjarjes, që është bërë mediatike edhe nga emisioni investigativ “STOP”.
Materialet procedurale do të referohen në Prokurorinë e Rrethit Gjyqësor Tiranë, për veprime hetimore të mëtejshme, për veprat “Vjedhja” dhe “Vjedhja duke shpërdoruar detyrën”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
