Kreu i Kishës Ortodokse Serbe, Patriarku Irinej ka ndërruar jetë si pasojë e Covid-19. Ai ishte shtruar në një spital në Beograd që prej datës 4 tetor.
Dy ditë më parë, Kisha Ortodokse Serbe doli me një deklaratë duke thënë se gjendja e Patriarkut Irinej ishte e qëndrueshme.
Mbetet e paprovuar, por dyshohet fort se Patriarku Irinej është infektuar me Covid gjatë ceremonisë së varrimit të Metropolitit Amfilohije në Mal të Zi më 1 nëntor.
Metropoliti i Malit të Zi vdiq nmë 30 tetor si pasojë e Covid. Patriarku Irinej udhëhoqi liturgjinë në ceremoninë e varrimit të tij, ku morën pjesë mijëra besimtarë.
Protokollet e sigurisë në këtë ceremoni nuk u respektuan. Në varrim ishte i ekspozuar arkivoli i hapur me trupin e mitropolitit, priftërinjtë, shumica e besimtarëve, si dhe disa politikanë nuk vunë maska dhe as nuk respektuan distancën fizike. Kjo shkaktoi reagimin e autoriteteve shëndetësore malazeze, që e cilësuan si shkelje flagrante të protokolleve kundër përhapjes së Covid.
Irinej u zgjodh në postin më të lartë në Kishën Ortodokse Serbe, në Janar të vitit 2010.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
