Shqipëri-Bjellorusi është një ndeshje rivalësh direkt, që vendos për kreun e grupit 4 në Ligën e Kombeve. Kjo ndeshje e rëndësishme, ku kuqezinjve u duhet vetëm fitorja për të parakaluar bjellorusët, do të gjykohet nga rumuni Radu Petresku, me ndihmës Radu Ginguleaç dhe Mirçea Grigoriu, kurse Marsel Birsan do të jetë arbitër i katërt.
Petresku ka 8 vite që mban stemën e FIFA-s. Në karrierë ka më shumë se 300 ndeshje, por një pjesë e vogël e tyre janë të nivelit ndërkombëtar. Rumuni 38-vjeçar ka gjykuar 2 ndeshje eliminatore Europiani, 16 ndeshje në Ligën e Europës dhe 6 ndeshje kualifikuese në Ligën e Kampioneve. Gjatë sezonit aktual ka nxjerrë 4 kartonë të kuq, 2 në derbin e Bukureshtit dhe 2 në Ligën e Europës, në ndeshjen mes Bazelit dhe Anorthosisit.
Për Shqipërinë është pozitiv fakti se është një arbitër ballkanas dhe e njeh më mirë temperamentin tonë. Ndeshja me Bjellorusinë zhvillohet të mërkurën, në orën 16:00, në “Air Albania Stadium”. Kuqezinjtë e kanë vetë në dorë fatin e tyre, mjafton të mundin Bjellorusinë dhe kapin vendin e parë në grup, me 11 pikë. Trajneri Reja ka një mungesë të madhe në këtë sfidë, Amir Abrashin, i skualifikuar për shkak kartonësh. Rikthehet ndërkohë nga skualifikimi mesfushori tjetër, Qazim Laçi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
