Një tjetër kuqezi i shtohet Serisë A, njërit prej 5 kampionateve më të fortë në botë. Ardian Ismajli, mbrojtësi i Kombëtares, ka arritur akordin me Specian, ekipin që për herë të parë në historinë e tij do të jetë pjesë e nivelit më të lartë të futbollit italian. Futbollisti 23-vjeçar deri tani ka qenë pjesë e Hajduk Splitit në Kroaci dhe paraqitja e mirë me këtë skuadër ka bërë që ai të ndiqet nga klubet e kampionateve më të forta.
Nga kjo lëvizje, sipas detajeve të dhëna nga “Panorama Sport”, që i referohet menaxherit të lojtarit, Erkan Sulejmani, Hajduku përfiton 3 milionë euro, kurse vetë Ismajli do të përfitojë pak më shumë se 1 milion euro në sezon. Kontrata e tij e me klubin e italian është katërvjeçare dhe zyrtarizimi pritet të bëhet sot. Për futbollistin e Kombëtares shqiptare kanë pasur interes edhe Benevento dhe Leçe në Itali. Largimi i tij nga Kroacia ishte vetëm çështje kohe.
Ismajli ndodhet në Shqipëri aktualisht, pasi për shkak të një dëmtimi nuk udhëtoi me Kombëtaren për në Bjellorusi. Trajneri Edi Reja shpreson ta ketë gati për ndeshjen e 7 shtatorit me Lituaninë. Mbrojtësi që në fillim ka luajtur për Prishtinën në Kosovë, ka qenë titullar me kuqezinjtë në të gjitha ndeshjet e fundit. Ismajli u bashkohet kështu kuqezinjve të tjerë në Serinë A, Strakoshës te Lacio, Hysajt te Napoli, Kumbullës te Verona, Gjimshitit tek Atalanta dhe Vrionit te Juventusi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
