.png)
Për Edi Ramën 30 qershori është mbyllja e një kapitulli të vështirë për vendin dhe hapja e një kapitulli tjetër. Pasi përjashtoi dorëheqjen si opsion, kapitullin e ri Rama e nisi me ftesën për dialog pa kushte me opozitën, por me kushte për një marrëveshje të mundshme.
Kushti i parë i vendosur prej tij ishte një pakt për një gjuhë të përbashkët të të gjithë klasës politike sa i takon integrimit të vendit.
“Nëse duan paqe politike, paqe do të kenë. Nëse duan marrëveshje, marrëveshje do të kenë dhe marrëveshja do të ndërtohet vetëm me dialog pa kushte dhe me shprehjen pa ngurrim të vullnetit për t’u angazhuar të gjithë bashkarisht për të ndihmuar çeljen e negociatave për anëtarësimin në BE. Vendimi i tetorit i Këshillit Europian nuk është në dorën tonë, edhe sikur të vëmë kunjën këtu, por mund të bëjmë më shumë për hapjen e negociatave nëse kunjën e brendshme nuk e bëjmë punë të jashtme. Dora ime është e shtrirë”, tha Rama.
Kushti i dytë i Kryeministrit lidhet me reformën zgjedhor. Ai kujtoi ofertën e mazhorancës drejtuar Partisë Demokratike për t’u rikthyer në Komisionin e Reformës Zgjedhore, jo me statusin e bashkëkryetarit, por me atë të vëzhguesit me të drejtë vetoje.
“Reforma zgjedhore sipas rekomandimeve të OSBE/ODIHR dhe BE mbetet një sfidë e përbashkët me opozitën parlamentare dhe atë joparlamentare, për të cilën ka një karrige bosh së bashku me të drejtën e vetos”, tha Rama.
Kushti tjetër i Ramës lidhet me reformën në drejtësi. Kjo reformë, sipas tij, nuk mund të jetë pjesë e tryezës së dialogut dhe nuk negociohet. Kushti që vendos për opozitën në këtë rast është vetëm zotimi për ta mbështetur.
“Reforma në drejtësi jo, nuk negociohet, as diskutohet por vetëm mbështetet. Nuk kam as disponimin më minimal për asnjë pazar politik për të ndenjurat e politikanëve dhe për asnjë marrëveshje për të penguar drejtësinë që të merret me zullumet e politikanëve djathtas apo majt”, u shpreh Kryeministri.
Votën e së dielës, Rama e cilësoi një borxh të thelluar në të cilin shqiptarë futën Qeverinë e tij, ndërsa gjithë procesin e vlerësoi si epilogun e një beteje të vështirë.
“Ishte një fitore e vështirë, mbasë më e vështira në betejat e derisotme zgjedhore të Shqipërisë. Unë vetë nuk mbaj mend një më të vështirë, sepse nuk luftuan mes vetes kundërshtarë, sado të ndërkryer kundër njëri-tjetrit në zgjedhje, por luftoi vetë sistemi ende i brishtë demokratik me kundërshtarët e ndërkryer të vetë zgjedhjeve”, tha ai.
Kryeministri kërkoi vetëpërmbajtje dhe premtoi se në bashkitë e djathta, që do të dorëzojnë detyrën tek kryebashkiakët e rinj socialistë nuk do të ketë asnjë spastrim të administratës si formë hakmarrjeje politike.
“Asnjë grua apo vajzë nuk do të largohet. Vëndet e zëna me kushërirllëk apo pa meritë nuk kanë si të justifikohen as mos pastrohen. Është koha për një politikë të re, hapje të re, dhe të strukturuar të PS-së ndaj njerëzve të zot për t’i shërbyer shtetit që po përpiqemi të ndërtojmë” , deklaroi Kryeministri.
Rama u shpreh i bindur se me këmbënguljen për të zhvilluar zgjedhje më 30 qershor e vendosi Partinë Socialiste në anën e duhur të historisë dhe paralajmëroi nisjen në korrik të një analize të thellë qeverisëse dhe hapjen e partisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
