.png)
Partia Demokratike akuzoi Kryeministrin Edi Rama se me të njëjtën skemë të zbuluar në përgjimet nga dosjet 339 dhe 184 po detyron qytetarët që të marrin pjesë në zgjedhjet e së dielës, që sipas opozitës është farsë dhe i paligjshëm.
Albana Vokshi thotë se e njëjta skemë po zbatohet në administratë dhe punonjës të sektorit publik, përfshirë këtu edhe ndaj mjekëve, infermierëve dhe personelit shëndetësor, së bashku me familjarët e tyre.
“Njësoj siç keni dëgjuar nga përgjimet e gazetës gjermane Bild, ku mësuesit kërcënoheshin “me fluturim nga puna të hënën, nëse nuk votonin Edi Ramën, edhe tani, po ndiqet e njëjta skemë. Duke përdorur kërcënimet e paligjshme ndaj personelit shëndetësor, synohet rritja artificiale e pjesëmarrjes në votimet moniste të Edi Ramës.”, deklaroi Vokshi.
PD thotë se ka marrë denoncime të vazhdueshme përgjatë tri ditëve të fundit, që sipas saj, tregojnë se skema e kërcënimit është masive ndaj të gjithë punonjësve publike, duke shkelur të drejtat e tyre dhe duke i kërcënuar me vendin e punës.
“Skema është krejtësisht e paligjshme dhe zbatohet nga persona janë anëtarë të shtabit elektoral të Edi Ramës. Ata telefonojnë personelin mjekësor, sipas listave që u janë vënë në dispozicion në mënyrë të paligjshme, duke i kërcënuar se, nëse duan ta ruajnë vendin e punës, duhet të dalin në votime të dielën. Duke zbatuar këtë skemë kriminale, njerëzit e Edi Ramës shkelin të paktën 4 nene të Kodit Penal, që ndëshkohen me disa vjet burg”, deklaroi Vokshi.
Pavarësisht se nuk e njeh 30 qershorin si datë zgjedhjes, PD është pajtur me faktin që ky proces do të vëzhgohet nga OSBE/ODIHR dhe në deklaratën e saj, Albana Vokshi thotë se opozita beson se këto denoncime të opozitës do të reflektohen në raportin vëzhgues të këtij organizmi ndërkombëtar.
“Partia Demokratike beson fuqimisht se faktet e presionit kriminal ndaj administratës do të zënë vend sërish në raportin e misionit vëzhgues të OSBE/ODIHR, njësoj si dy vjet më parë”, shtoi Vokshi.
PD kërkon nga të gjithë punonjësit e administratës, që sipas saj po shantazhohen dhe kërcënohen me vendin e punës që të denoncojnë rastet në fjalë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
