Deputeti i Partisë Demokratike, Tritan Shehu e konsideron shkelje të rëndë ligjore mosmiratimin në kohë të listës së barnave të rimbursueshme për vitin 2018.
Sipas Shehut funksionimi ende i listës së vitit 2016 ka shkaktuar kosto financiare në buxhet, por nga ana tjetër është në disfavor të pacientëve.
“Ka kosto mbi pacientin se nuk janë rifreskuar ilaçet, por ka shkaktuar humbje në buxhet me gati 15 për qind të tij, për shkak të kursit të euros”, thotë Tritan Shehu.
Kjo vonesë në miratimin e listës së barnave të rimbursueshme për Tritan Shehun është e qëllimshme dhe ka arsye korruptive.
“Së pari bëhet për veprimatri korruptive dhe veprimtari të nëndheshme interesash, të cilat siç duket akoma nuk kanë gjetur pajtim dhe zgjidhje mes tyre. Së dyti, bëhet nga paaftësia dhe amullia që ekziston në strukturat që janë përgjegjëse ligjore, që çdo vit duhet të nxjerrin listën e barnave të rimbursueshme”, deklaron deputeti demokrat.
Lista e barnave të rimbursueshme për herë të fundit është miratuar në vitin 2016. Si rregull, lista e barnave të rimbursueshme pasi konsultohet me të gjithë shefat e shërbimeve në QSUT, miratohet në Qeveri dhe hyn në fuqi në fillim të muajit prill për çdo vit.
Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
