Kur njoftoi dekretin e anulimit të 30 qershorit si datë zgjedhjes, Presidenti Ilir Meta tha se shpresonte që ky vendim i tij të ulte mazhorancën dhe opozitën në një tryezë për të gjetur një marrëveshje, sipas të cilës të dekretonte datën e re të mbajtjes së tyre.
Për mazhorancën vendimi mbetet nul, nga opozita u përshëndet, por sërish Lulzim Basha nuk beson se do të sjellë zgjidhje të krizës. Zgjidhja, sipas kryetarit të Partisë Demokratike është vetëm largimi i Edi Ramës.
“Nuk besoj se zgjidhja e krizës do të vijë nga Presidenti. Nuk ka asnjë ulje në tryezë me Edi Ramën sa kohë që ai është në krye të një qeverie ilegjitime”, u shpreh ai.
Zhvillimet e deritanishme i japin të drejtë kryetarit të Partisë Demokratike. Dekreti nuk e ka stepur opozitën nga kërkesa e saj për dorëheqjen e Edi Ramës dhe as Edi Ramën nga mbajtja e zgjedhjeve më 30 qershor. E kundërta ka ndodhur. Paralelisht me fushatën mazhoranca kaloi në Kuvend edhe një mocion kundër dekretit të Metës.
Tani, përplasja e madhe është Presidencë-Kryeministri dhe në mungesë të Gjykatës Kushtetuese, të dyja palët e interpretojnë dekretin dhe Kushtetutën sipas agjendës së tyre. Edi Rama e ka shpërfillur dhe ka vijuar me fushatën zgjedhore me këmbënguljen se zgjedhjet do të zhvillohen më 30 qershor, ndërsa Ilir Meta ka shpërfillur kërcënimet për shkarkim dhe mocionin e mazhorancës duke nisur takimet me disa parti politike për të caktuar datën e re të zgjedhjeve.
Bindjen se ligjërisht dhe sipas Kushtetutës nuk ka zgjedhje më 30 qershor e ndan edhe Lulzim Basha, ndërkohë që përplasjen Rama-Meta, së bashku me mocionin e socialistëve e konsideron si strategji të Edi Ramës për të hequr vëmendjen nga skandalet e Qeverisë.
“Ka vënë në skenë teatrin e shkarkimit të Presidentit. E gjithë logoreja e sotme e Parlamentit ilegjitim ka vetëm një qëllim: të shpërqënsdrojë vëmendjen e opinionit nga fakti që e gjithë Europa dhe bota e di që ne kemi në krye të vendit një bandit të kapur me presh në duar, një njeri që përfaqëson ilegjitimitet, që ka ardhur në pushtet me ndihmën e krimit të organizuar. Mos kini asnjë iluzion, farsa e sotme përfundoi në rezolutë dhe do të përfundojë në një qortim të Edi Ramës. Është pjesë e teatrit të Ramës për të larguar vëmendjen nga kriza ku ka futur vendin”, deklaroi Basha.
Bashkëbisedimin me gazetarët, Basha e nisi me një rezyme të gjatë për nevojën urgjente, sipas tij, që ka vendi për të larguar Edi Ramën. Ai tha se Rama e ka të lidhur pazgjidhshmërisht pushtetin e tij me krimin që në kohën kur drejtonte Bashkinë e Tiranës.
Për të ilustruar se në ç’fazë është bashkëpunimi, sipas Bashës, i Edi Ramës me krimin sot, kreu i PD-së solli si shembull mocionin e Parlamentit holandez që i bëri thirrje qeverisë vendase që të bllokojë hapjen e negociatave për Shqipërinë.
“Se ku ndodhet sot ky bashkëpunim mjafton të përmendet vendimi i Holandës, që ka cituar qartësisht në vendimin e Parlamentit arsyet se përse refuzon hapjen e negociatave; mungesa e luftës kundër krimit të organizuar dhe korrupsionit”, tha Basha.
Basha citoi raportin e OSBE/ODIHR për zgjedhjet e 2017, për të thënë se vota u ble prej Edi Ramës dhe veç Vangjush Dakos përmendi emrin e Ulsi Manjës, Xhemal Qefalisë, Paulin Stërkajt e të Damian Gjiknurit si persona që kanë komunikuar me elementë kriminalë për të blerë zgjedhjet në 2017.
I pranishëm në konferencën e kreut të PD-së ishte edhe një gazetar i Al Jazeera. Gazetari e pyeti Bashën se si dilet nga kjo krizë dhe çfarë ka ndryshuar që prej 21 shkurtit, kur opozita dogji mandatet në bllok.
“Shumë ka ndryshuar. Ndryshimi më i mëdh është se 30 qershori nuk është më datë zgjedhjesh. Që prej të hënës, dekreti i Presidentit ka hyrë në fuqi. Në situatën aktuale, ku Shqipëria s’ka Gjykatë Kushtetuese, nuk ka një institucion tjetër që mund të shqyrtojë këtë dekret. Kemi një situatë të re politike në vend që prej dekretit të Presidentit. Kjo është pritur nga disa si mundësi për të bërë qeverinë që të kuptojë se është koha për të gjetur një zgjidhje politike”, tha ai.
Kryetari i Partisë Demokratike nuk pret as më pak dhe as më shumë se dorëheqjen e Edi Ramës dhe pyetjes së gazetarit të huaj sesi do ta arrijë këtë mision i përsëriti qëndresën dhe revoltën qytetare.
“Shqipëria po shkon drejt një diktature. Pushteti i bashkimit do të prevalojë mbi lojërat e pushtetit që Rama dhe një grusht njerëzish po luajnë në kurriz të demokracisë dhe të popullit shqiptar”, u përgjigj Basha.
Basha i cilësoi gënjeshtra që Edi Rama i përdor për t’iu shmangur skandaleve korruptive dhe të lidhjeve me krimin, akuzat e Kryeministrit se opozita i trembet reformës në drejtësi, ndaj ka dalë në rrugë dhe nuk hynë në zgjedhje dhe se me aksionin e saj synon të dëmtojë imazhin e Shqipërisë.
“Dy gënjeshtra të Edi Ramës. Është që kjo po bëhet për të dëmtuar Shqipërinë dhe e dyta për reformën në drejtësi. Sa për të parën përgjigjen e dhanë holandezët, që flasin drejtpërdrejtë dhe me pak fjalë. E dyta është një gënjeshtër dyvjeçare e Edi Ramës. Sa herë është kapur me skandale ka thënë që kjo bëhet për të penguar reformën në drejtësi. U kap me Xibrakën, Tahirin, Rrahman Rrajan, Xhafajn, me Unazën dhe Milot-Balldren tha se gjithçka po bëhet për të penguar reformën në drejtësi. Për këdo që ka dy fijë mend kuptohet që i vetmi person i interesuar për të ndalur reformën në drejtësi, ose për ta kapur atë plotësisht është një; njëjti person që shkatërroi Gjykatën Kushtetuese dhe Gjykatën e Lartë”, thotë Basha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
