Deputeti i PS, Ilir Ndraxhi emri i të cilit është përmendur në audiopërgjimet e publikuara nga prestigjiozja gjermane “Bild”, është shprehur se nuk ka asnjë lidhje me Avdylajt, një nga bandat më të rrezikshme dhe më ndikim në zonën e Shijakut dhe të Durrësit.
Deputeti Ndraxhi thotë se Avdylajt nuk kanë bërë fushatë për të dhe nuk i ka takuar ndonjëherë.
“Pasi mora vesh për përgjimet, mora në telefon vëllain dhe e pyeta nëse ka ndonjë gjë të vërtetë, por ma mohoi. Avdylajt nuk kanë bërë fushatë për mua dhe nuk i kam takuar ndonjëherë. Unë kam dalë deputet për shkak të mbështetjes që kam në zonën time. Nuk di nëse vëllai im i njeh apo i ka takuar ndonjëherë”, është shprehur deputeti Ndraxhi për Ora News.
Në përgjimet e publikuara nga gazeta gjermane ‘Bild’, pretendohet që kreu i bandës, Astrit Avdylaj të ketë ndikuar që Ilir Ndraxhi të bëhet deputet në zgjedhjet parlamentare të 2017-s.
Dhe pikërisht në serinë e përgjimeve të “Bild” vihet re një bisedë për blerjen e votave ku Astrit Avdylaj shprehet se do ta surprizojë Edi Ramën për të fituar 10 deputetë të PS-së, siç rezulton në përgjimin ndërmjet Arjan Ndraxhit, vëllait të kandidatit për deputet të PS-së, Ilir Ndraxhi, i renditur i katërti në listën e socialistëve për Qarkun e Durrësit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
