.png)
Menjëherë pas përfundimit të seancës gjyqësore për dosjen “Babale” që vendosi të marrë të pandehur për kallëzim të rremë ish-deputetin e PD-së, Ervin Salianji ka reaguar nëpërmjet një deklarate për mediat kryedemokrati Lulzim Basha.
Sipas Bashës, Prokuroria është pjesë e skemës mafioze të shtetit, prandaj coi në gjyq jo kriminelët, por denoncuesit e krimit.
“Prokuroria është pjesë e skemës mafioze të narkoshtetit. Prokuroria nuk ka guxuar as të thërrasë e të nisë hetimet, por Rama ka marrë në mbrojtje e ka promovuar zyrtarët e policisë. Sot prokurorët e çështjes dhe një gjyqtar peng i vettingut, çoi në gjyq jo kriminelët, por denoncuesit e krimit. Dënoj ashpërsisht këtë vendim”, shprehet Basha.
Lidhur me këtë vendim, Basha kërcënoi gjyqtarët se do u bëhet vetting publikisht nga PD.
“Ia bëj të qartë gjyqtarit dhe dy prokurorëve se nuk do ia hedhin vetingut me këtë akt që kanë ndërmarrë. Një për një vettingu do i bëhet publikisht nga PD. Kanë zotimin tim sot. I bëj thirrje çdo prokurori mos t’i bëjë llogaritë me kriminelët në ikje, por me drejtësinë e re. Shpreh vendosmërinë se ky objekt do të zbatohet deri në fund”, u shpreh ndër të tjera Basha.
Gjykata e Tiranës vendosi sot të nisë procesin e gjykimit për dosjen “Babalja” dhe gjykatësi paraprak firmosi për kalimin e çështjes në gjyq.
Katër të pandehurit në seancën gjyqësore kërkuan pushimin e gjykimit, kërkesë e cila nëse do ishte pranuar, do konfirmonte faktin se prokuroria kishte dështuar me hetimet e saj.
Të pandehur janë ish-deputeti Ervin Salianji, Fredi Alizoti, Albert Veliu dhe gazetari Jetmir Olldashi për akuzën e “kallëzimit të rremë”. Sot Salianji deklaroi se nuk intimidohet nga paditë ndaj tij dhe se do të ketë surpriza të tjera në të ardhmen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
