Pas vizitës dy ditore në Berlin, Lulzim Basha nuk mund të largohej pa dhënë një mesazh të fortë për shqiptarët dhe për qeverinë e Edi Ramës, të cilën kërkon ta rrëzojë me protesta.
Kreu i Partisë Demokratike, këmbëngul se djegia e mandateve dhe dalja nga Parlaamenti ka qenë vendimi i duhur për opozitën. Sipas tij kthim pas nuk do të ketë, deri në rrëzimin e plotë të regjimit të Edi Ramës.
“Në Evropë nuk shkohet me hilera, nuk shkohet me gënjeshtra, nuk shkohet me një shtet të kapur nga krimi. Shkohet me vlera, me të vërteta, me një shtet të çliruar nga keqqeverisja dhe me një Parlament të zgjedhur nga populli shqiptar. Kur bie vota e lirë ka rënë demokracia”.
Ishte ky sinjali i Bashës edhe për BE që tregon se ai nuk ka ndërmend të tërhiqet nga ideja për largimin e kryeministrit dhe zhvillimin e zgjedhjeve të parakohshme.
Ndër të tjera, kreu i PD, në intervistën e tij për “Deutche Welle” u pyet nëse opozita do të rikthehet në Parlament, por në mënyrë kategorike theksoi në përgjigjen e tij se nuk ka kthim pas.
Basha u shpreh se synimi është vendosja e sistemi demokratik funksional në shërbim të qytetarëve dhe për këtë, u shpreh se gëzon mbështetjen e partnerëve gjermanë.
“Largimi nga Parlamenti ndodhi pas shterimit të çdo mundësie për të zgjidhur në mënyrë institucionale këtë krizë të thellë legjitimiteti. Ju kujtoj që partnerët gjermanë në Bundestag dhe qeverinë gjermane i njohin këto probleme. Gjërat jo vetëm nuk kanë ndryshuar por janë përkeqësuar. Dalja e opozitës nga Parlamenti është një dalje pa kthim, kriza politike është reale por është një mundësi e madhe jo thjesht për të larguar një qeverisje të lidhur me krimin por për t’u dhënë shqiptarëve një sistem demokratik funksional që u shërben atyre dhe jo partive. Kam besim të madh që ky transformim që tashmë ka nisur, do të ketë mbështetje nga të gjithë shqiptarët e ndershëm. Në institucionet gjermane kemi gjetur mbështetje për këtë gjendje transformuese”, tha Basha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
