.png)
Dy persona janë vrarë me armë zjarri mëngjesin e së shtunës në qytetin e Shkodrës. Ngjarja ka ndodhur në zonën e njohur si “Zooteknike”, në lagjen Kiras.
Nga raportimet e para mësohet se viktimat janë Astrit dhe Ibrahim Bilali. Ndaj tyre mësohet se janë zbrazur më shumë se 10 plumba, ndërsa grupi i ekspertizës në vendin e ngjarjes pritet të saktësojë se me çfarë arme janë qëlluar dy vëllezërit.
Autorët kanë studiuar shumë mirë lëvizjet, dhe kanë pritur që dy vëllezërit të dalin nga banesa. Aty i kanë qëlluar me armë duke i lënë të vdekur në vend.
Astrit Bilali është babai i Asmer Bilalit, i arrestuar si pjesë e grupit Bajri. Asmer Bilali ra në qendër të mediave kohë më parë kur mbeti i vrarë Arjan Ferracaku teksa kalëronte. Resorti i kuajve është në pronësi të babait të Asmerit, Astritit, i cili mbeti i vrarë në një atentat sot.
Ferracaku dhe Asmer Bilali ishin të afërt dhe dilnin shpesh për hipizëm, pasi ishin të apasionuar pas kuajve. Asmer Bilali ishte i pranishëm në momentin e ekzekutimit të biznesmenit Ferracaku me breshëri plumbash.
Ai është ish-kampion boksi, emër i njohur i sportit në Shkodër. Në vitin 2012 ai ishte boksieri i vetëm nga katër shqiptarët që arriti të kualifikohej në turneun kualifikues të Lojërave Olimpike “Londër 2012”.
29-vjeçari është person me precedentë të mëparshëm, pasi cilësohej si i dyshuari kryesor për plagosjen e 20-vjeçarit Hermes Beqiri në një nga lokalet e Shkodrës, ngjarje e ndodhur në vitin 2017.
Brahim Balili ishte kryetar i Shoqatës 2 prilli në Shkodër. Ai ishte një person aktiv në pjesën mediatike, për shkak të reagimeve të shumta që shoqata e drejtuar prej tij kishte në lidhje me situata politike, dhe jo vetëm.
Mësohet se pas ngjarjes është gjetur dhe një automjet i djegur, i cili dyshohet se është përdorur nga autorët e ekzekutimit.
Policia është nisur drejt vendit të ngjarjes, ndërsa pritet të zbardhen detaje të reja nga ngjarja e rëndë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
