.png)
Pas publikimit të raportit të Departamentit Amerikan të Shtetit, i cili thoshte se Shqipëria është burim kryesor i kanabisit, vjen edhe reagimi i Partisë Demokratike.
Enkelejd Alibeaj, nëpërmjet një deklarate për mediat, u shpreh se raporti thekson se korrupsioni në çdo nivel të qeverisjes kufizon efektivitetin e luftës ndaj drogës dhe se korrupsioni ushqen një ambient ku trafikantët e drogës mund të lëvizin pa u ndëshkuar.
“Shqipëria mbetet në rrezik domethënës për shkak të korrupsionit të shfrenuar. Raporti thekson se Shqipëria evidentohet si bazë për aktivitetin e organizatave kriminale.
Edi Rama dhe qeveria e tij kriminale ia arritën ta klasifikojnë Shqipërinë si vend prodhues dhe eksportues për marijuanën dhe ta kthejë në një vend tranzit për transportin e kokainës dhe heroinës”, u shpreh ai.
Sipas PD-së, zgjidhje mbetet vetëm shembja e pushtetit.
“Është domosdoshme që të largohet përgjegjësi i kësaj situate. Zgjidhja e vetme shembja e këtij pushteti. Edi Rama është vetëm me një grusht trafikantësh dhe oligarkësh. Shqiptarët janë ngritur më këmbë për të mos e lejuar Edi Ramën për ta shndërruar vendin zyrtarisht në një narkoshtet. Shqipëria meriton të jetë si gjithë Europa”, tha ndër të tjera Alibeaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
