.png)
Numri i turistëve që vizituan Shqipërinë gjatë janarit 2024 raportohet pothuajse 96 mijë, me një rritje 27% nga janari i shkuar.
Sipas INSTAT, rreth 47 mijë e vizitorëve ishin rezidentë dhe 49 mijë jo-rezidentë.
Paralelisht u rrit edhe numri i netë qëndrimeve që rezulton 50% më i lartë se në janarin e 2023-shit, përkthyer në pothuajse 170 mijë netë qëndrime.
Netë qëndrimet për rezidentët raportohen rreth 75 mijë, ndërsa për jo-rezidentët rreth 95 mijë.
Të ndara sipas rajoneve, ai qendror rezulton më i preferuar, me 63% të netë qëndrimeve. Hotelet dhe të ngjashme mbeten lloji më i përdorur i akomodimit, ndërkohë që vërehet një rënie e interesit për hapësirat në natyrë.
Shqiptarët e Kosovës dhe italianët ishin vizitorët kryesorë të Shqipërisë gjatë janarit, respektivisht 14.3% dhe 13.3% ndaj totalit. 3.4% ishin nga Gjermania dhe 2.5% nga Mbretëria e Bashkuar.
Gjatë këtij muaji, norma e shfrytëzimit të dhomave të “Hoteleve dhe akomodimeve të ngjashme” është 14.2%, kundrejt 8.6% që ishte në muajin Janar 2023. Norma e shfrytëzimit të shtretërve të “Hoteleve dhe akomodimeve të ngjashme” është 14%, kundrejt 7.2% që ishte në muajin Janar 2023.
Normat neto të shfrytëzimit, të dhomave dhe të shtretërve, janë dy tregues të cilët masin përqindjen e shfrytëzimit të kapaciteteve akomoduese, dhoma e shtretër të disponueshëm për vizitorë.
Në publikimin e parë mbi këtë temë për vitin 2024, INSTAT njofton se të dhënat e Anketës së Strukturave Akomoduese janë mbledhur nëpërmjet vrojtimit tërësor pranë këtyre strukturave përkundrejt vrojtimit me kampionim që përdorej në vitet paraardhëse.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
