78% e bizneseve mendojnë se çmimet e larta të karburanteve dhe të energjisë elektrike ndër shkaqet kryesore për shkallën e ulët të produktivitetit dhe konkurencës të prodhimeve dhe shërbimeve te tyre.
Gjetja është e anketës së përvitshme të realizuar nga Qendra e Studimeve të Konfindustrisë në periudhën kohore nëntor-dhjetor 2019.
Bizneset kanë vlerësuar si negativë në produktivitetin dhe konkurueshmërinë e tyre në treg tregjet e mbylluara/ monopolet, korrupsionin, infrastrukturën, legjislacionin e dobët, politikat ekonomike, tregtare, fiskale, kreditimin, sigurinë, etj.
Nisur nga anketimi, Konfindustria sugjeron se vendimarrja politike duhet të mendojë seriozisht dhe sa më shpejt për ristrukturimin e plotë dhe përmirësimin e sektorëve të karburanteve dhe energjisë elektrike.
“Shqipëria prej një kohe të gjatë rradhitet ndër vendet e para në botë për çmimin e lartë dhe cilësinë e ulët të karburanteve.
Më shumë se 60% e çmimit fundor të karburanteve e përbëjnë taksat dhe tatimet shtetërore. Shmangiet fiskale shoqëruese të cilësisë së dobët të karburanteve në qarkullim si pasojë e kontrollit shtetëror të pamjaftueshëm e bën gjendjen edhe më shqetësuese.”- citohet në sugjerimet e Konfindustrisë.
Sipas saj, çmimi i energjisë elektrike për bizneset është nga më të lartët në rajon, duke ndikuar drejtpërdrejte në kostot dhe uljen e shkallës së konkurueshmërisë së prodhimeve dhe shërbimeve të markës “ Made in Albania”.
Çmimet e larta të energjisë dhe karburanteve krahasimisht me vendet konkurente në rajon dhe më gjerë, thotë Konfindustria, godasin drejtpërdrejt tërheqjen e investimeve të vendit dhe të huaja, shtojnë ndjeshëm rrezikun e falimentimeve në rradhë të parë të industrive dhe pengojnë zhvillimin ekonomik në afatgjatë të vendit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.