Koha ishte ajo që kërkoi Kryeministri Edi Rama për të gjithë ata që e kanë humbur durimin për drejtësi për 21 janarin. Kryeministri doli në një bashkëbisedim me ndjekësit në rrjetet sociale për të përsëritur se hetimi dhe ndëshkimi i fajtorëve realë të tragjedisë së 11 viteve më parë nuk është më në dorën e tij.
“Pashë komentatorë mbrapa bravës duke thënë se fajin shpesh, qysh në krye të herës, por përsërisin, se fajin e kam unë, se i thirra njerëzit në protestë, ndërkohë që nëse nuk ndalemi te kriminelët që tërhoqën këmbëzën, fajtorët e vërtetë për ato vrasje ndodhen njëri mbi Foltore që do të marrë SHQUP-in dhe tjetri pas bravave duke mbrojt SHQUP-in”, tha Rama, duke iu referuar Berishës dhe Bashës.
"Besoj se e kemi shlyer atë pjesë të detyrimit që na takon me dëshmorët e 21 janarit dhe nuk e kam fjalën për shpalljen Dëshmorë të Atdheut, apo qëndrimit pranë të familjeve, por e kam fjalën për reformën në drejtësi, e cila përgojohet përditë nga kundërshtarët e saj, armiqtë e saj, foltore më foltore, bravë më bravë, por që është guri i themelit të munguar prej 100 vitesh në këtë shtet ku drejtësia nuk ka qenë kurrë drejtësi, por ose një gurë në dorën e pushtetit për të masakruar armiqtë, apo gurë në pazarllëqet me jetët e të tjerëve”, u shpreh ai.
Si shembull se edhe në këtë rast drejtësia do të veprojë një ditë, Kryeministri iu referua një tjetër tragjedie me përmasa edhe më të rënda.
“Gërdeci u rihap dhe po hetohet. Kështu do të ndodhë edhe më 21 janarin. PS mori përsipër të vendosë këtë gurë themeli. Durimi është një gjë e rrallë në këtë vend sepse njerëzit kanë pritur shumë. Mua mund të më shfryheni sa të doni, i mirëpres të gjitha, por nuk mund të më kërkoni llogari për 30 vjet e as mund të kërkoni të pamundur, funksionimin e plotë të drejtësisë kur akoma nuk është tharë boja në reformën në drejtësi. Kjo është si të kërkosh që një fëmijë të bëhet burrë për 4 vjet”, vijoi ai.
Në këtë bashkëbisedim, Rama komentoi edhe Presidentin Ilir Meta, që në prag të zgjedhjeve të 6 marsit duket se ka rinisur shpërndarjen e dekoratave.
"Çfarë të përgjigjet Ilir Meta për 21 janarin dhe çfarë mund të bëjë tjetër Meta veçse të shpërndajë dekorata, që janë një tallje e madhe për ata njerëz që shkojnë dhe marrin dekoratat e Ilir Metës", deklaroi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.