.png)
Nga Gazeta Si - Sikurse ishte deklaruar që në nisje të vitit të ri akademik, në universitetet publike shqiptare, numri i studentëve të regjistruar për këtë vit është më i vogël se një vit më parë.
Shifrat zyrtare nga Rrjeti Akademik shqiptar, RASH, referuar 2 raundeve të regjistrimit, tregojnë se këtë vit janë 21.323 studentë që nisin vitin e ri akademik, ose 500 më pak se në vitin 2022 kur numri i të regjistruarve ishte 21.800.
Sipas kreut të RASH, Arjan Xhelaj, nuk ka një shifër konkrete për kuotat e lira, por nga një vëzhgim i Gazetasi.al në portalin zyrtar ku janë kryer aplikimet për në universitet, www.ualbania.al , shihet se të rinjtë kanë braktisur përfundimisht në të dyja raundet (dhe raundin e lirë) degët e shkencave ekzakte si kimi e biologji si dhe degët e gjuhëve të huaja, greqisht, italisht dhe rusisht.
Në degën e gjuhës spanjolle në UT, janë 4 studentë që kanë fituar të drejtën e studimit, ndërsa kuotat e lira janë zyrtarisht 56.
Nëse vëren kuotat e lira në universitetin e Tiranës, sheh se degë si psikologjia, teknologjia e informacionit, informatikë dhe informatikë ekonomike, kanë 0 kuota të lira ndërsa degët kimi, kimi industriale dhe ushqimore, kimi dhe teknologji ushqimore, biologji kanë mbetur të paprekura sikurse ishin në raundin e mëparshëm, çka tregon për një braktisje nga ana e të rinjve.
Mungesa e interesit për këto degë, sipas ekspertëve të fushës, lidhet me mungesën e tregut të punës për këto profesione.
Gjithashtu, edhe në degën e Fizikës në universitetin e Tiranës, këtë vit do të jenë 8 studentë të regjistruar, pasi në portal referohet për ende 46 kuota të lira të parealizuara, nga 54 total që fakulteti i Shkencave të Natyrës ka deklaruar për këtë vit të ri akademik.
E njëjta panoramë dhe në degën e Kimisë, ku kuotat e lira janë 55 dhe të regjistruar vetëm 5 studentë.
Edhe në fazën e fundit të regjistrimeve, universiteti Politeknik, Bujqësor dhe Universiteti i Mjekësisë kanë patur kërkesa për kuotat e lira të shpallura pas mbylljes së dy raundeve. Por ka patur dhe degë të tilla si Bioteknologji-zooveterinari dhe Agromekanizëm në Universitetin Bujqësor ku nuk është regjistruar asnjë student.
I vetmi që ka realizuar kuotat 100% është universiteti i Mjekësisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
